Saiasattanýshy Ǵaziz Ábishev jariialanǵan jańa Konstitýtsiia jobasyna qatysty óz túsindirmesin usyndy. Onyń aitýynsha, qujatta bilik tarmaqtarynyń qalyptasý tártibi men ókilettikteri naqty aiqyndalǵan, dep habarlaidy Dalanews.kz.
Sarapshynyń sózinshe, jańa Konstitýtsiia jobasyna sáikes, Quryltai tóraǵasyn depýtattar prezidenttiń usynysy boiynsha sailaidy. Iaǵni, spiker laýazymyna úmitkerdi Memleket basshysy usynady.
Ǵaziz Ábishevtiń túsindirýinshe, eger Quryltai usynylǵan kandidatýrany qabyldamai, keiin ony ekinshi ret te keri qaitarsa, prezident Quryltaidy taratady.
Sonymen qatar saiasattanýshy jańa Konstitýtsiia jobasynda prezident ókilettigi merziminen buryn toqtaǵan jaǵdaida biliktiń sabaqtastyǵy naqty bekitilgenin atap ótti.
«Bilik prezidenttiń merziminen buryn ketýi jaǵdaiynda vitse-prezidentke, odan keiin Quryltai tóraǵasyna, keiin premer-ministrge ótedi», – dep túsindirdi ol.
Jobaǵa sáikes, prezident vitse-prezidenttiń kandidatýrasyn Quryltaiǵa usynady. Bul kandidatýra qarapaiym kópshilik daýyspen maquldanýy tiis.
Saiasattanýshynyń aitýynsha, vitse-prezidenttiń ókilettikterin de prezident aiqyndaidy jáne ony kez kelgen ýaqytta óz sheshimimen qyzmetten bosata alady.
Ǵaziz Ábishevtiń paiymdaýynsha, jalpy alǵanda jańa Konstitýtsiia jobasy prezidenttiń Quryltaiǵa birqatar negizgi laýazymdarǵa kandidatýra usynýyn kózdeidi. Atap aitqanda, Memleket basshysy:
- vitse-prezidentti;
- Quryltai tóraǵasyn;
- premer-ministrdi
bekitý úshin Quryltaidyń qaraýyna engizedi.
Quryltaidyń bul kandidatýralarǵa qarsy daýys berýge quqyǵy bar. Alaida saiasattanýshy jobadaǵy mańyzdy tusty erekshe atap ótti.
«Prezident usynǵan kandidatýra eki ret keri qaitarylǵan jaǵdaida, Quryltai “taratylýy múmkin” emes, naqty túrde “taratylady” dep jazylǵan», – deidi ol.
Osylaisha, sarapshynyń pikirinshe, jańa Konstitýtsiia jobasy bilik institýttary arasyndaǵy ózara qatynasty qatań reglamenttep, prezident ókilettigin sheshýshi deńgeide bekitýdi kózdeidi.
Eske salaiyq, búgin jańa Konstitýtsiianyń jobasy jariialandy.
