Túrkistan oblysynyń ákimi Darhan Satybaldy Saýran aýdanyna jumys sapary barysynda Eski Iqan aýyldyq okrýgindegi «DATQA» jeke kásipkerliginiń tamshylatyp sýarý ádisi arqyly egilgen maqta alqabynda boldy. Jobanyń jetekshilerimen kezdesip, pikir almasty, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Joba bastamashysy Qanat Kósherbaevtyń aitýynsha, maqta keshteý egilgenine qaramastan, ónimdiligi óte joǵary. Bul nátijege tamshylatyp sýarý tásili arqyly qol jetkizilip otyr. Qytailyq investormen birlese atqarylyp jatqan jobanyń quny – 100,0 mln. teńge. 133 gektar alqapqa jańa tásilmen maqta egilgen. Jobanyń qýattylyǵy jylyna 10 myń tonna bolady dep kútilip otyr.
– Tamshylatyp sýarý, jańbyrlatyp sýarý, sý únemdeý tehnologiialaryn jappai engizýimiz kerek. Ózge kásipkerlerge, áriptesterińizge, sharýalarǵa osy tásilderdi úiretińizder. Jaýapty basqarma osy baǵytta jumys júrgizsin. Birinshiden, sý únemdeledi, ekinshiden, ónimdilik artady, úshinshiden, tabys molaiady. Óte tiimdi, – dedi Darhan Satybaldy.
Atalǵan maqta alqabynyń jumysyn júrgizý úshin qural-jabdyq satyp alýǵa Qytaimen kelisimshart jasalǵan. Aýyl sharýashylyǵy tehnikalary, dán sepkish quraly, tamshylatyp sýarý tehnologiiasynyń kesheni jetkizilgen. 5 tik drenajdy uńǵyma qazylyp, elektr baǵanalary ornatylǵan. Aldaǵy ýaqytta osy tásilmen maqta egý kólemin ulǵaitý josparlanyp otyr.
