تۇركىستان وبلىسىنىڭ اكىمى دارحان ساتىبالدى ساۋران اۋدانىنا جۇمىس ساپارى بارىسىندا ەسكى يقان اۋىلدىق وكرۋگىندەگى  «داتقا» جەكە كاسىپكەرلىگىنىڭ تامشىلاتىپ سۋارۋ ءادىسى ارقىلى ەگىلگەن ماقتا القابىندا بولدى. جوبانىڭ جەتەكشىلەرىمەن كەزدەسىپ، پىكىر الماستى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

جوبا باستاماشىسى قانات كوشەربايەۆتىڭ ايتۋىنشا، ماقتا كەشتەۋ ەگىلگەنىنە قاراماستان، ونىمدىلىگى وتە جوعارى. بۇل ناتيجەگە تامشىلاتىپ سۋارۋ ءتاسىلى ارقىلى قول جەتكىزىلىپ وتىر. قىتايلىق ينۆەستورمەن بىرلەسە اتقارىلىپ جاتقان جوبانىڭ قۇنى – 100،0 ملن. تەڭگە. 133 گەكتار القاپقا جاڭا تاسىلمەن ماقتا ەگىلگەن. جوبانىڭ قۋاتتىلىعى جىلىنا 10 مىڭ توننا بولادى دەپ كۇتىلىپ وتىر.

– تامشىلاتىپ سۋارۋ، جاڭبىرلاتىپ سۋارۋ، سۋ ۇنەمدەۋ تەحنولوگيالارىن جاپپاي ەنگىزۋىمىز كەرەك. وزگە كاسىپكەرلەرگە، ارىپتەستەرىڭىزگە، شارۋالارعا وسى تاسىلدەردى ۇيرەتىڭىزدەر. جاۋاپتى باسقارما وسى باعىتتا جۇمىس جۇرگىزسىن. بىرىنشىدەن، سۋ ۇنەمدەلەدى، ەكىنشىدەن، ونىمدىلىك ارتادى، ۇشىنشىدەن، تابىس مولايادى. وتە ءتيىمدى، – دەدى دارحان ساتىبالدى.

اتالعان ماقتا القابىنىڭ جۇمىسىن جۇرگىزۋ ءۇشىن قۇرال-جابدىق ساتىپ الۋعا قىتايمەن كەلىسىمشارت جاسالعان. اۋىل شارۋاشىلىعى تەحنيكالارى، ءدان سەپكىش قۇرالى، تامشىلاتىپ سۋارۋ تەحنولوگياسىنىڭ كەشەنى جەتكىزىلگەن. 5 تىك درەناجدى ۇڭعىما قازىلىپ، ەلەكتر باعانالارى ورناتىلعان. الداعى ۋاقىتتا وسى تاسىلمەن ماقتا ەگۋ كولەمىن ۇلعايتۋ جوسپارلانىپ وتىر.