Premer-mınıstr Oljas Bektenov Úkimet otyrysynda bilim mınıstri Ǵanı Beısembaevqa bıyl saýnada balalar lageriniń ashylýyna jol bermeý kerek ekenin eskertti, dep habarlaıdy Dalanews.kz.

“Ótken jyly monsha jáne basqa da talaptarǵa saı kelmeıtin oryndarda jazǵy lagerler uıymdastyrylǵanyn kórdik. Bıyl mundaı jaǵdaıǵa jol bermeýimiz kerek. Ony qatań baqylaýda ustańyz”, - dedi Bektenov.

Eske salaıyq, 2023 jyly Almaty oblysy Uzynaǵash aýylynda shildeniń ortasynda jantúrshigerlik oqıǵa bolǵan edi. Munda jazǵy demalysyn ótkizý úshin Almatydan ondaǵan bala kelgen. Alaıda mektep oqýshylary jaıly jaǵdaıdyń ornyna tar, jeldetilmeıtin bólmelerge qonystanǵan. Sondaı-aq, lager saýnanyń dál ishinde ornalasqan, munda syrtta er adamdar demalatyny belgili boldy.

Prokýrorlar lager jetim jáne ata-anasynyń qamqorlyǵynsyz qalǵan balalarǵa arnalǵan Almaty qalalyq bilim basqarmasynyń búdjetinen qarjylandyrylǵanyn anyqtaǵan edi.