Sáýle Nurǵojina: «Jeke basynyń máselelerin ákimdikti bopsalap sheshkisi keletinder bar»
– Ataýly áleýmettik kómek boiynsha jumystar atqarylyp jatyr. Elorda boiynsha qansha otbasy áleýmettik kómek alyp otyr?
– Elorda boiynsha sáýir aiynan beri jańa formattaǵy ataýly áleýmettik kómek 5 500 otbasyǵa berilýde. Ol 5 500 otbasyda 33 000 myń adam. Sonyń ishindegi 3 114 otbasy kópbalalylar sanatyna jatady. Ol kópbalaly otbasylardaǵy adam sany – 20 myńǵa jýyq. 8 naýryzda 14 473 kópbalaly anaǵa bir rettik aqshalai járdemaqy berildi. Olardyń otbasylary qalalyq qoǵamdyq kólikterde tegin qatynaidy. Bul da otbasy úshin úlken kómek dep oilaimyn.
– Áleýmettik járdemaqylar tólene bastasa da qalada ákimdiktiń ǵimaratyna áiel adamdardyń jii baratynyn baiqaimyz. Bul kisilerdiń talaby qandai, nege kóńili tolmaidy?
– Birinshiden, ákimdikke kelip júrgen áiel azamattardyń ishindegi negizgi uiymdastyrýshylar qala ákiminiń, orynbasarlarynyń qabyldaýynda birneshe ret boldy. Bizdiń basqarmaǵa da kelip turady. Qala ákimdiginiń ǵimaratynan arnaiy azamattardy qabyldaý kabineti ashyldy.
Olarǵa quqyqtyq konsýltatsiialar berilip, memleketten kómek alýdyń barlyǵy da túsindirildi. Kómekke shyn muqtaj azamattar da joq emes. Olarǵa zań aiasynda tiisti kómekter kórsetildi. Azyq-túlik alýǵa, balalaryn kiindirýge, balabaqshaǵa tólei almaǵandarǵa járdem berildi.
Sonymen qatar, qabyldaýǵa kelgen azamattardyń arasynda ataýly áleýmettik kómek boiynsha aqparattar jetkiliksiz dep ótinish aitqandar da boldy.
Biz jaqynda járdemaqyny qalai alý kerektigin qalalyq eki gazet «Astana aqshamy» jáne «Vecherniaia Astana» gazetterine jariialadyq. Ol jerde qadam-qadammen infografikalar arqyly túsindirildi. Biz tizimde turǵan áleýmettik jaǵynan az qamtylǵan, múmkindigi shekteýli balalar tárbielep otyrǵan, kópbalaly otbasylardyń barlyǵyna sol gazetterdi tegin tarattyq. Sondai-aq, áleýmettik jelilerdegi paraqshalarymyzda barlyq aqparattar ornalastyrylǵan.
Ekinshiden, jyl basynda áleýmettik járdemaqylar boiynsha birneshe talap qoiyldy. Kómekke shyn muqtaj azamattar ataýly áleýmettik kómektiń arqasynda turmystyq jaǵdailarynyń túzelgenin aitýda. Memleketke rahmet aityp jatqandar óte kóp. Shyndyǵyn aitar bolsaq, qyryq kisi bir jaq, qyńyr kisi bir jaq bolyp otyrǵan jaiy bar. Shyn máninde halyqtyń turmysyna oń yqpalyn tigizgen kómek boldy dep aitýǵa bolady.
Úshinshiden, Siz aityp otyrǵan áiel azamattardyń ishinde negizsiz talap qoiyp, ákimdik qyzmetkerlerin zańsyz jolmen jeke bastarynyń máselelerin sheshýge itermeleitinder bar. Naqty aitqanda 14-15 áiel azamat bar. Olar 15-20 mln. teńge nesiesin jaýyp berýin talap etedi. Zańsyz jolmen baspana alyp berýdi talap etýde.
Ózińiz bilesiz, qalada 40 myńnan asa adam baspana kezeginde turǵany jii aitylady. Ákimdikke kelip aiǵailaǵannyń bárine páter berile berse, ádilet qaida qalady? Biz quqyqtyq memleket emespiz be?! Zań bárine ortaq. Osylardy aityp, mán-jaidy qansha túsindirsek te «Eger sheshpeseńder, bizdiń chattarymyzda áielder kóp. Qajet bolsa 200-300 áieldi kóshege shyǵaramyz» deidi sol toptardyń ákimshileri. Iaǵni, jeke basynyń máselelerin ákimdikti qorqytyp-úrkitý arqyly sheshkisi keledi. Bul – qylmys, zańǵa qaishy dep bilemin.
