Qazaqstandaǵy alǵashqy atom elektr stantsiiasynyń qurylysyna shamamen 18,5 milliard dollar jumsalýy múmkin. Bul týraly Atom energiiasy jónindegi agenttiktiń tóraǵasy málimdedi, dep habarlaidy dalanews.kz.
Onyń aitýynsha, joba aiasynda eki atom energoblogyn salý jáne oǵan qajetti infraqurylymdy damytý kózdelgen.
Jalpy somanyń 16,5 milliard dollary stantsiia qurylysyna baǵyttalsa, taǵy shamamen 2 milliard dollar fizikalyq qaýipsizdik sharalary men áleýmettik infraqurylymdy damytýǵa jumsalady.
Jobany qarjylandyrý Resei tarapynan beriletin eksporttyq nesie esebinen júzege asyrylýy múmkin. Qazir eki eldiń profildik vedomstvolary nesie sharttaryn talqylap jatyr. Sátqalievtiń sózinshe, usynylyp otyrǵan qarjylandyrý talaptary Qazaqstan úshin tiimdi dep baǵalanýda.
Qazirgi ýaqytta bolashaq atom elektr stantsiiasy salynatyn aýmaqta injenerlik-zertteý jumystary júrgizilip jatyr.
Negizgi qurylys jumystary 2027 jyly bastalady dep josparlanǵan. Sol kezde alǵashqy beton quiý jumystary qolǵa alynbaq.
Alǵashqy energoblokty 2034 jyly iske qosý josparlanyp otyr. Mamandar mundai aýqymdy nysandardyń qurylysy ádette shamamen 10 jylǵa sozylatynyn atap ótti.
