Saiasattanýshy Dimash Áljanov Qairat Satybaldyǵa qatysty shyqqan jańa úkim týraly oiyn aitty, - dep habarlaidy Dalanews.kz.
Áljanovtyń sózinshe, Satybaldy úkimi ózgergennen keiin merziminen buryn bostandyqqa shyǵýy múmkin.
"Bul jerde áńgime memleketke aqshalardy qaitarýynda emes. Munda kelisimge kelip, aktivterin tartyp alý arqyly júie ishindegi qarsylastardy álsiretý máselesi turýy múmkin. Qańtardan keiin Toqaevtyń aldynda taraptarǵa ziian keltirip, jalpy qarsylasýǵa barmai-aq óz biligin turaqtandyrý mindeti turdy. Sebebi júiedegi adamdardyń jasyratyny bar jáne bir-birine qarsy qoldanatyn nársesi bar. Sondyqtan eks-prezidenttiń nemere inilerine jáne olardyń ainalasyndaǵy adamdarǵa qatysty ashyq tergeý júrgizilgen joq. Al Satybaldy jasaǵan qylmys tek ekonomikalyq sipatta bolǵan.
Satybaldynyń úkimine qarap "áýlet" qarjy jaǵynan jazalanǵanyn, al olardyń óz ortalaryndaǵy senim azaia túskenin baiqaýǵa bolady", - deidi Áljanov Ras aitamyn-ǵa bergen suhbatynda.
Saiasattanýshy Toqaev pen Nazarbaev arasyndaǵy ýaǵdalastyqtar men kepildikter áli de saqtalǵanyn aitady.
Eske salaiyq,Qairat Satybaldyǵa qatysty sot úkimi ózgergen bolatyn. 16 tamyzda Qazaqstannyń eks-prezidenti Nursultan Nazarbaevtyń nemere inisi Qairat Satybaldynyń jazasyn shekteý sharasyna aýystyrý týraly ótinishi qanaǵattandyryldy.
"Óskemen qalasynyń №2 soty sottalǵan Qairat Satybaldynyń jazasynyń ótelmegen bóligin jazanyń neǵurlym jeńil túrine aýystyrý týraly ótinishhatyn qarady. Qairat Satybaldy múlki tárkilenip, memlekettik qyzmet atqarý quqyǵynan 10 jylǵa deiingi merzimge aiyryla otyryp, 6 jylǵa bas bostandyǵynan aiyrylǵan bolatyn. Sottalǵan óziniń ótinishhatynda jazasynyń ótelmegen bóligin neǵurlym jeńil túrine aýystyrý týraly ótinishhatyn berý úshin zańnyń barlyq talaptaryn oryndaǵanyn atap kórsetken", - dep jazdy sot.
