ساياساتتانۋشى ديماش ءالجانوۆ قايرات ساتىبالدىعا قاتىستى شىققان جاڭا ۇكىم تۋرالى ويىن ايتتى، - دەپ حابارلايدى Dalanews.kz.
ءالجانوۆتىڭ سوزىنشە، ساتىبالدى ۇكىمى وزگەرگەننەن كەيىن مەرزىمىنەن بۇرىن بوستاندىققا شىعۋى مۇمكىن.
"بۇل جەردە اڭگىمە مەملەكەتكە اقشالاردى قايتارۋىندا ەمەس. مۇندا كەلىسىمگە كەلىپ، اكتيۆتەرىن تارتىپ الۋ ارقىلى جۇيە ىشىندەگى قارسىلاستاردى السىرەتۋ ماسەلەسى تۇرۋى مۇمكىن. قاڭتاردان كەيىن توقايەۆتىڭ الدىندا تاراپتارعا زيان كەلتىرىپ، جالپى قارسىلاسۋعا بارماي-اق ءوز بيلىگىن تۇراقتاندىرۋ مىندەتى تۇردى. سەبەبى جۇيەدەگى ادامداردىڭ جاسىراتىنى بار جانە بىر-بىرىنە قارسى قولداناتىن نارسەسى بار. سوندىقتان ەكس-پرەزيدەنتتىڭ نەمەرە ىنىلەرىنە جانە ولاردىڭ اينالاسىنداعى ادامدارعا قاتىستى اشىق تەرگەۋ جۇرگىزىلگەن جوق. ال ساتىبالدى جاساعان قىلمىس تەك ەكونوميكالىق سيپاتتا بولعان.
ساتىبالدىنىڭ ۇكىمىنە قاراپ "اۋلەت" قارجى جاعىنان جازالانعانىن، ال ولاردىڭ ءوز ورتالارىنداعى سەنىم ازايا تۇسكەنىن بايقاۋعا بولادى"، - دەيدى ءالجانوۆ Ras aitamyn-عا بەرگەن سۇحباتىندا.
ساياساتتانۋشى توقايەۆ پەن نازاربايەۆ اراسىنداعى ۋاعدالاستىقتار مەن كەپىلدىكتەر ءالى دە ساقتالعانىن ايتادى.
ەسكە سالايىق،قايرات ساتىبالدىعا قاتىستى سوت ۇكىمى وزگەرگەن بولاتىن. 16 تامىزدا قازاقستاننىڭ ەكس-پرەزيدەنتى نۇرسۇلتان نازاربايەۆتىڭ نەمەرە ءىنىسى قايرات ساتىبالدىنىڭ جازاسىن شەكتەۋ شاراسىنا اۋىستىرۋ تۋرالى ءوتىنىشى قاناعاتتاندىرىلدى.
"وسكەمەن قالاسىنىڭ №2 سوتى سوتتالعان قايرات ساتىبالدىنىڭ جازاسىنىڭ وتەلمەگەن بولىگىن جازانىڭ نەعۇرلىم جەڭىل تۇرىنە اۋىستىرۋ تۋرالى ءوتىنىشحاتىن قارادى. قايرات ساتىبالدى مۇلكى تاركىلەنىپ، مەملەكەتتىك قىزمەت اتقارۋ قۇقىعىنان 10 جىلعا دەيىنگى مەرزىمگە ايىرىلا وتىرىپ، 6 جىلعا باس بوستاندىعىنان ايىرىلعان بولاتىن. سوتتالعان ءوزىنىڭ ءوتىنىشحاتىندا جازاسىنىڭ وتەلمەگەن بولىگىن نەعۇرلىم جەڭىل تۇرىنە اۋىستىرۋ تۋرالى ءوتىنىشحاتىن بەرۋ ءۇشىن زاڭنىڭ بارلىق تالاپتارىن ورىنداعانىن اتاپ كورسەتكەن"، - دەپ جازدى سوت.
