Keshe, 18 mamyrda Atyraýda bir otbasynyń birneshe múshesiniń ólimine qatysty aiyptalǵan Sultan Sársemalievtiń isi boiynsha sot protsesi boldy. Otyrysta prokýror aiyptaý aktisin oqyp, qaiǵyly oqiǵaǵa deiingi otbasylyq janjaldyń qalai órbigenin baiandady, dep habarlaidy dalanews.kz.
Aiyptaý aktisine sáikes, Sultan Sársemaliev pen Aqbaian Muqanǵalieva 2022 jyly zańdy túrde ajyrasqan. Tergeý nusqasy boiynsha, erli-zaiyptylar arasyndaǵy kelispeýshilik ata-enemen birge turý máselesinen bastalǵan.
Memlekettik aiyptaýshynyń aitýynsha, 2022 jyly Aqbaiannyń anasy Óteshqalieva qyzynyń kúieýiniń ata-anasymen birge turýyna qarsy bolǵan. Ol qyzynan otbasymen birge qalada jalǵa alynǵan úide bólek turýyn talap etken. Alaida Sársemaliev óz ata-anasyn tastap ketpeitinin aityp, bul talappen kelispegen.
Osy jaǵdaidan keiin erli-zaiyptylar arasynda janjal týyp, Aqbaian Muqanǵalieva ajyrasý týraly aryz jazǵan. 2022 jyldyń tamyzynda ol qyz bosanyp, ata-anasy jaldap bergen úide balalarymen birge turǵan. Al 22 qarashada neke resmi túrde buzylyp, sot sheshimimen balalar anasynyń janynda qalǵan.
Keiin Sársemaliev otbasymen qaita birge turýǵa niet bildirip, 2023 jyldan bastap Aqbaiannyń janyna kóship barǵan. Sol jyldyń aqpanynda ol Munaishy móltek aýdanynan úi jaldap, áieli men balalarymen birge sonda turǵany aityldy.
Aiyptaý aktisinde 2024 jylǵy jaǵdailar da baiandaldy. Málimetke súiensek, 2024 jyldyń 10 tamyzynda Sársemaliev pen Muqanǵalieva tórt balasymen birge Aqbaiannyń ata-anasynyń úiine demalysqa barǵan. Sol jerde Aqbaian aýyryp qalyp, júkti kezinde oǵan ota jasalǵan. Operatsiia aýyr ótip, áiel 20 kún komada jatqan.
Prokýrordyń sózinshe, dál osy kezeńde Aqbaiannyń týystary Sársemalievti qalaǵa jibergisi kelmegen. Aiyptaý tarapynyń nusqasy boiynsha, olar kúieý balasy qalaǵa ketse, balalardy óz ata-anasynyń úiine alyp ketýi múmkin dep qaýiptengen. Osy jaǵdai Sársemalievtiń qaiyn jurtyna degen ashý-yzasyn kúsheitken bolýy múmkin.
Aqbaian Muqanǵalieva 2024 jyldyń 10 qyrkúieginde aýrýhanadan shyqqan. Alaida keiin onyń psihikalyq jaǵdaiynda qiyndyqtar paida bolǵany aityldy. Budan soń Sultan Sársemaliev pen Naýryz Muqanǵaliev Aqbaiandy emdetý úshin Túrkiiaǵa alyp barǵan, biraq em nátije bermegen.
Aiyptaý dereginshe, keiin Atyraý mańyndaǵy jalǵa alynǵan úide Sársemaliev pen Naýryz Muqanǵalievtiń arasynda janjal shyqqan. Tergeý nusqasy boiynsha, sol janjal kezinde Sársemaliev Naýryzdy pyshaqtap óltirgen. Keiin marqumnyń denesin úidiń janynan qazylǵan shuńqyrǵa kómip, úidegi qan izderin tazalaǵan.
Sondai-aq aiyptaý aktisinde Sultan Sársemalievtiń Naýryz Muqanǵalievtiń atynan 4 million teńge nesie rásimdegeni aityldy.
