Jetisý oblysynyń Sarqan aýdanynda jýyq arada aýyz sý sapasyna qatysty másele sheshilip, turmystyq qatty qaldyqqa arnalǵan jańa poligon salynady. Bul týraly oblys ákimi Beibit Isabaev aýdan turǵyndarymen kezdesýi kezinde aitty,- dep habarlaidy Dalanews.kz
- Sarqan aýdanynda sheshimin kútken birqatar problemalar bolǵan. Atap aitqanda, aýyz sýdyń sapasyn jaqsartý jáne turmystyq qatty qaldyqtar poligonyn salý. Sý máselesin sheshýge 200 mln. teńge bólindi, Sarqan qalasynyń bas sý qabyldaǵyshyn aǵymdaǵy jóndeý osy jyldyń maýsym aiynda aiaqtalady. Sonyń arqasynda aýyz sý sapasy jaqsarady. Sondai-aq Almaly, Qoilyq jáne Ekiasha aýyldarynyń sý qubyry jelilerin rekonstrýktsiialaý úshin jobalar ázirlendi. Jáne de Sarqan qalasynda zamanaýi qoqys poligonyn salý jobasy daiyndalyp, respýblikalyq biýdjetke ótinim berildi, - dep atap ótti B.Isabaev.
Jalpy aýdanda ekologiiany jaqsartý úshin kógaldandyrý jumystary jalǵasýda. «Taza Qazaqstan» ekologiialyq baǵdarlamasy aiasynda biyl aýdanda 2200 aǵash kósheti otyrǵyzyldy. Saiabaqtar men skverlerdi abattandyrýǵa erekshe nazar aýdarylýda. Oblys ákimi «Jastar» jáne «Qoitas» saiabaqtarynda bolyp, atqarylǵan jumystardyń nátijelerin kórdi.
Osy oraida óńir basshysy «Qoitas» saiabaǵynyń biregeiligine nazar aýdaryp, bul tabiǵi ereksheligi saqtalǵan saiabaq jasaýdyń erekshe úlgisi ekenin atap ótti. Saiabaq aýmaǵynda kógaldandyrý men abattandyrý jumystarynyń edáýir bóligi qazirdiń ózinde atqarylyp bolǵan. Ony budan ári damytýdyń naqty josparlary bar. Bul rette oblys basshylyǵy tarapynan qajetti qoldaý kórsetiletin bolady, óitkeni qala infraqurylymyn tabiǵatqa ziian keltirmei damytýǵa baǵyttalǵan mundai bastamalar halyqtyń ómir súrý sapasyn arttyrý jumystarynda mańyzdy shara bolyp sanalady.
Atap ótsek, «Qoitas» saiabaǵy 2021 jyly qurylǵan, osy ýaqyttan bastap munda abattandyrý jumystary kezeń-kezeńimen júrgizilýde. Jalpy aýdany 6 ga saiabaqtyń aýmaǵynda fýtbol jáne sport alańdary, tennis korty, skeitbord alańy, jaiaý serýendeýge arnalǵan arnaiy jol, oryndyqtar, ýrnalar ornatylǵan, kóshe jaryǵy bar. Saiabaqqa 400 qaraǵai, san túrli 200 aǵash pen butalar otyrǵyzyldy, olar tamshylatý júiesi arqyly sýǵarylady. Aǵash otyrǵyzý qazir de júrip jatyr. Jaqynda saiabaqta 500 oryndy amfiteatry bar sahna bezendirilmek, taǵy bir serýendeý aimaǵy men qaiyq stantsiiasy bar kól paida bolady.
Aýdan úshin turǵyn úi máselesi áli de ózekti. Biyl mamyr aiynda Sarqan qalasynda 60 páterlik eki úidi paidalanýǵa berý josparlanýda. Budan basqa, halyqtyń áleýmettik osal toptarynan kezekte turǵandarǵa osy jyldyń 2-shi jartysynda jalǵa beriletin 10 úi iske qosylady.
- Sóitip 2023 jyly 44 úi, 2024 jyly 74 úi tapsyrylsa, biyl aýdanda 130 otbasy turǵyn úimen qamtylady, sonyń nátijesinde turǵyn úi kezegi 16%-ǵa qysqarady. Sonymen qatar turǵyn úidi tek aýdan ortalyǵynda ǵana emes, aýyldyq jerlerde de salý kerek. Bul aýdannyń aýyldaryn saqtap, damytýǵa, halyqtyń kóship ketýin boldyrmaý úshin de qajet, - dep atap ótti oblys ákimi.
Jalpy 2025 jyly Sarqan aýdanyna áleýmettik jáne infraqurylymdyq obektilerdi salýǵa, qaita jańǵyrtýǵa jáne jobalaý jumystaryna oblystyq biýdjetten 8,7 mlrd. teńge bólindi.
