Sargsian jarty mlrd dram (1 mln dollardan astam) memleket qarjysyn talan-tarajǵa saldy dep aiyptalyp jatyr. Ol kináli dep tabylsa, segiz jylǵa deiin bas bostandyǵynan aiyrylýy múmkin.
Bul is boiynsha eldiń aýyl sharýashylyǵy ministri bolǵan Sergo Karapetian, kásipker Barseg Beglarian jáne birqatar sheneýnikter de sot aldynda jaýap beredi.
Eks-prezident ózine taǵylǵan aiyptardyń bárin teriske shyǵaryp, saiasi astary bar degen senimde.
Serj Sargsian Armeniia prezidenti bolyp eki merzim, iaǵni on jyldan astam ýaqyt otyrdy. El Konstitýtsiiasyna sáikes prezident eki merzimnen artyq sailana almaidy. Biraq ol el basqaryp turǵanda, bilikti ustap turǵysy kelip, 2015 jyly konstitýtsiialyq reforma júrgizdi. Ol barlyq bilikti parlament taǵaiyndaityn premer-ministrge berdi.
Reforma júrgizer kezde Sargsian prezidenttikten ketkennen keiin, óziniń kandidatýrasyn premerlikke usynbaimyn dep ýáde berdi. Biraq ýádesin buzdy.
2018 jyldyń sáýir aiynda parlament Sargsiandy el premeri etip bekitti. Al Armeniia prezidenti eki saǵat ishinde onyń taǵaiyndalýy jóninde buiryqqa qol qoidy. Osydan keiin Armeniiada jappai tolqý bastalyp, "maqpal revoliýtsiiasyna" deiin jetti.
Jappai narazylyq sharasynan keiin Sargsian otstavkaǵa ketip, qateleskenin málimdedi. Ol basqaratyn Respýblikalyq partiia jańa sailaý kezinde parlamentke ótpedi. Parlament sailaýynda oppozitsiia lideri Nikol Pashinian jeńiske jetti. Pashinian bilikke kelgennen keiin Sargsiannyń jaqtastary men týystaryna qylmystyq is qozǵaldy.
