– Jıynnyń basynda Taıjan myrza (komısıa múshesi Muhtar Taıjan – avt.) biraz suraqtar qoıǵan bolatyn. Soǵan jaýap bereıin. «Saraıshyqtaǵy 620 gektar jer nege basqalarǵa beriledi?» degen suraq boldy. Ol 620 gektar jer qazaqstandyq azamat Mırzoev degenniń jeke menshiginde. Ol jerdi 2005 jyly alǵan. Qazirgi tańda sol jerde 170 gektar dekoratıvti aǵash egedi ol. Úıeńki, terek, ıva egilip jatyr. 40 gektar jerge bir jyldyq mal azyǵy daqyldaryn, shópter egedi. Aldaǵy ýaqytta 100 gektarǵa alma baǵyn egý josparlanýda. Jáne sol jerde medısına baǵytynda emdik shópter egý josparlanýda. Sebebi ol kisi mynaý Atyraýdyń túbinde farmasevtıkalyq fabrıkanyń qurylysy júrip jatyr. Quny – 7 mlrd. 400 mln. teńge. Sonyń quryltaıshylarynyń biri. Sol jerde ekken ósimdikterin sol fabrıkada qoldanady, – dedi N.Noǵaev.
Aımaq basshysynyń sózine qaraǵanda, kezinde Baqtyqoja Salahatdınulynyń (Atyraý oblysynyń burynǵy ákimi – avt.) tapsyrmasymen Saraıshyqtyń bir jarym kılometrin bekitý boıynsha jobalyq-smetalyq qujattama daıyndalǵan bolatyn. Jobanyń jalpy quny – 1 mlrd. 600 mln. teńge. Búginde ol aqshanyń 100 mln. teńgesi bólinip, konkýrstyq prosedýralar ótip jatyr. Kelesi jyly atalǵan jumystardy aıaqtaý josparlanyp otyr. Sondaı-aq6 N.Noǵaev Taısoǵan polıgonynyń jeri jaıynda aıtyp berdi.
– Taısoǵan polıgonynyń aýmaǵy 750 myń gektar bolǵan. Qazaqstan úkimetiniń júrgizgen kelissózderdiń nátıjesinde qazirgi tańda 625 myń gektar jer qaıtaryldy. Qazir qalǵany – 125 myń gektar. Sol Reseı Federasıasy men Qazaqstan Respýblıkasy arasyndaǵy memlekettik kelisimshartyń negizinde qoldanylyp jatyr, – dep atap kórsetti ol.
Aıta keteıik, komısıanyń búgingi otyrysy barysynda ekonomıkalyq toptyń jetekshisi A.Kúrishbaev jerdi jalǵa berýdiń demokratıalyq sharttaryn jarıalady. Taǵy bir toptyń jetekshisi Muhtar Taıjan bir adamǵa beriletin jerdiń kólemine shekteý ornatylatynyn, halyqtyń jerdi satýǵa qatysty komısıanyń árbir múshesi qandaı daýys bergenin bilýi kerektigin jetkizdi.
Al senatory Qýanysh Aıthanaovtyń oıynsha, Atyraý oblysynda 10 sotyq jer máselesin bir-eki jylda sheship tastaýǵa ábden bolady. Prezıdent N.Nazarbaev Úkimet basshysy Kárim Másimovty qabyldap, jer reformasy boıynsha respýblıkalyq komısıanyń jumys nátıjesin usynýdy tapsyrdy. Osy jáne basqa da máseleler tamyzdyń sońynda ótetin Úkimettiń keńeıtilgen májilisinde qaralmaq.
