Búgin elimiz úshin mańyzdy tarihi kún. Qazaqstannyń jańa Konstitýtsiiasy kúshine endi. Osyǵan orai, QR Prezidenti janyndaǵy Qazaqstannyń strategiialyq zertteýler institýtynyń (QSZI) Abai oblysy boiynsha ókili, «Óńirler boiynsha jumys» bóliminiń bas sarapshysy Berik Qadyrov jańa Ata Zańnyń mańyzy, onyń saiasi-ekonomikalyq yqpaly men el bolashaǵyna áseri týraly pikir bildirdi, dep habarlaidy dalanews.kz.
Sarapshynyń aitýynsha, jańa Konstitýtsiia qoldanystaǵy Ata Zańdy jańǵyrtýǵa baǵyttalǵan qurylymdyq ózgeristermen tolyqtyrylǵan. Qujat eldiń saiasi, ekonomikalyq jáne áleýmettik reformalaryn tiimdi júzege asyrýǵa quqyqtyq negiz qalyptastyrady.
«Basty artyqshylyǵy – onyń halyqtyq Konstitýtsiia bolýynda. Óitkeni ol el tarihynda alǵash ret qoǵamnyń barlyq toptarynyń keń kólemdegi qatysýymen ázirlenip, jalpyhalyqtyq referendým arqyly qabyldandy», – dedi Berik Qadyrov.
Onyń pikirinshe, Konstitýtsiiaǵa engizilgen ózgerister bilik tarmaqtarynyń arasyndaǵy tepe-teńdikti kúsheitip, memlekettik organdardyń jaýapkershiligin arttyrýǵa múmkindik beredi. Sonymen qatar Quryltai men Halyq keńesi siiaqty jańa institýttar azamattardyń memlekettik basqarýǵa qatysýyn keńeitedi.
Sarapshy jańa konstitýtsiialyq modelde ekonomikalyq máselelerge de erekshe kóńil bólingenin atap ótti. Onyń aitýynsha, memleket adal básekelestik ortasyn qalyptastyryp, strategiialyq resýrstardy qorǵaý men kásipkerlikti qoldaý arqyly naryqtaǵy teń jaǵdaidy qamtamasyz etýge umtylady.
Berik Qadyrov jańa Konstitýtsiiada ekologiialyq máselelerdiń de mańyzdy oryn alǵanyna nazar aýdardy.
«Konstitýtsiianyń jańa nusqasynyń 37-babynda memleket azamattardy tabiǵatty saqtaý men tabiǵi bailyqqa uqypty qaraýǵa mindetteidi, sondai-aq adamnyń ómir súrýine jáne densaýlyǵyna qolaily qorshaǵan ortany qorǵaýdy memleket óz jaýapkershiligine ainaldyrady», – dedi ol.
Sarapshynyń sózinshe, mundai ózgerister Qazaqstannyń investitsiialyq tartymdylyǵyn arttyrýǵa da yqpal etýi múmkin. Onyń aitýynsha, investorlar úshin sot júiesiniń táýelsizdigi, menshik quqyǵynyń qorǵalýy jáne memlekettik organdar qyzmetiniń ashyqtyǵy asa mańyzdy.
«Konstitýtsiiaǵa engizilgen institýtsionaldyq jáne qurylymdyq ózgerister investitsiialyq ahýaldy odan ári jaqsartýǵa, quqyqtyq kepildikterdi nyǵaitýǵa jáne biznes júrgizý úshin qolaily orta qalyptastyrýǵa jetkilikti múmkindikter usynady», – dedi Qadyrov.
Ol búginde Qazaqstan Ortalyq Aziiadaǵy investitsiia tartýdyń jetekshi ortalyǵy ekenin aityp, óńirge keletin sheteldik investitsiialardyń 60 paiyzdan astamy elimizdiń úlesine tiesili ekenin jetkizdi. Sonymen qatar Qazaqstan B-READY 2025 reitinginde 69,2 ball jinap, álem boiynsha 29-orynǵa turaqtaǵanyn eske saldy.
Berik Qadyrov jańa Konstitýtsiia azamattardyń memleketke degen senimin kúsheite alatynyn, alaida bul onyń normalarynyń is júzinde qalai oryndalatynyna bailanysty ekenin aitty.
«Jańa Ata zańymyz, ondaǵy engizilgen ózgerister azamattardyń memleketke degen senimin kúsheite alady dep esepteimin. Bul tek Konstitýtsiianyń qabyldanýymen ǵana emes, onyń normalarynyń naqty ári tiimdi júzege asyrylýyna, tájiribede kórinis berýine bailanysty bolady», – dedi ol.
Sarapshynyń aitýynsha, azamattardyń memleketke degen senimin arttyratyn negizgi tetikterdiń biri – Halyq keńesi.
«Ataýy aityp turǵandai bul halyqtyń múddesin bildiretin joǵarǵy konsýltativtik organ. Bilik pen qoǵam, halyq arasynda konstrýktivti dialog ornatatyn, qoǵamnyń ár salasynyń, múshesiniń únin, muń-muqtajyn jetkizetin, óńirlerge qajet zań jobalaryna bastama jasai alatyn, joǵary senim men jaýapkershilikke ie qurylym», – dedi Qadyrov.
Sóz sońynda sarapshy jańa Konstitýtsiianyń eldiń uzaq merzimdi damýyna berik quqyqtyq negiz qalaitynyn aitty.
«Jańa Konstitýtsiia – Ádiletti Qazaqstandy qurýdyń berik quqyqtyq irgetasy. Onyń ómirsheńdigi árbir el azamatynyń zańǵa, tártipke qurmetimen, árbir memlekettik qyzmetshiniń jaýapkershiligimen jáne qoǵamnyń ortaq birligimen ólshenedi degen pikirdemin», – dep túiindedi Berik Qadyrov.
