Donald Tramptyń prezident sailaýynda jeńiske jetýi álem elderi úshin de mańyzdy oqiǵa. Sonyń biri Ýkraina men Resei arasyndaǵy jaǵdaiǵa da qatysty. Bul tusta sarapshylar túrli pikir aitady, - dep habarlaidy Dalanews.kz Euronews-qa siltep.
Basylym málimetinshe, AQSh prezidenti sailaýynda Donald Tramptyń jeńiske jetýi Ýkraina bolashaǵyna qatysty belgisizdikti kúsheitedi. Respýblikalyq partiia ókili prezident retinde sailansa, soǵysty 24 saǵat ishinde toqtatýǵa ýáde bergen bolatyn.
"Tramp myrza óziniń daiyndyǵy men óte jyldam beibit kelisimge keltirýge qabiletti ekenin málimdedi, bul Kievtiń Reseidiń talaptaryna moiynsunýǵa májbúr bolatynyn bildirýi múmkin".
Eýroparlament depýtattary da bul týraly oiyn bildirgen. "Eýropa patriottary" fraktsiiasynyń ókili Antonio Tanjer Korrea Tramptyń jeńisine qýanyshty. Ol NATO-ny qoldaitynyn rastady jáne Ýkrainadaǵy soǵystyń aiaqtalýy jaqyn ekenine úmittendi.
"Ol Ýkrainadaǵy soǵysty toqtatady dep úmittenemin jáne bul sheshim bárine unaidy. Biz buǵan qatyspaimyz. Ózderińiz biletindei, biz Ýkrainany qoldaimyz, biraq oǵan tikelei qatyspaimyz. Biz NATO-ny saqtaýdy qoldaimyz. Bul - Amerika Qurama Shtattaryn da, bizdi de qorǵaýǵa qabiletti uly uiym, óitkeni Soltústik Atlantika - álem úshin de, biz úshin de mańyzdy aimaq", - dedi Tanjer Korrea.
Sotsial-demokrat depýtat Elio Di Rýpo eski kontinentti "energetika, qaýipsizdik jáne qorǵanys siiaqty salalarda óziniń óndiristik saiasatyn" qabyldaýǵa shaqyrady.
"Búgingi tańda bizdiń qaýipsizdigimiz NATO ishindegi Amerika Qurama Shtattaryna bailanysty. Bizdiń óz múmkindikterimiz bolýy kerek", - dedi ol.
Aita keteiik, buǵan deiin L.N. Gýmilev atyndaǵy Eýraziia ulttyq ýniversiteti Saiasattaný kafedrasynyń meńgerýshisi m.a. Janat Momynqulov Dalanews.kz-ke suhbat berip, sailaý nátijeleri týraly boljam jasady.
"Tramp álemdik saiasatta oiyp turyp oryn alady. Onyń ústine qazirgidei daǵdarys, soǵys jaǵdaiynda onyń is-qimyly - bári óte mańyzdy. Biraq Harris qalǵan jaǵdaida Amerikanyń osy saiasaty jalǵasa beredi. Qytaiǵa, Reseige, Iranǵa qatysty shekteý, tejeý saiasaty júredi.
Meniń oiymsha, Harristiń jeńisine qýanamyz. Al Tramp keletin bolsa, Reseimen qarym-qatynasyndaǵy ózgerister Ortalyq Aziiaǵa, bizge salqyn áser etedi. Bári ainalyp kelgende halyqaralyq júiege áser etedi. Biz boljap bolmaityn oqiǵalar bastalyp ketýi múmkin. Harris Ortalyq Aziiaǵa jańa bir kózqaras tanytýy múmkin, ol - Aq úidiń mańyndaǵy biýrokrattardyń ókili, turaqtylyqtyń "garantiiasy". Al Tramp kelse, Ýkrainadaǵy jaǵdai uzaqqa sozylatyn daýǵa ainalýy múmkin. Sondyqtan, meniń oiymsha, Harristiń kelgeni Qazaqstanǵa tiimdi. Ortalyq Aziiaǵa tikelei áseri bolmasa da, sheshimderi arqyly ainalyp kelgende áseri bolady", - dedi ol.
