Sarandaǵy jylytý maýsymynda olqylyq jibergender eskertý aldy, - dep habarlaidy Dalanews.kz.
Saran qalasynyń ákimi Erkin Baýlyqov pen Qaraǵandy oblysynyń energetika jáne TKSh basqarmasynyń basshysy Tilektes Dosaev qatań sógis aldy. Oblys ákiminiń birinshi orynbasary Azamat Taijanovqa eskertý túrinde tártiptik jaza jariialandy.
Bul týraly oblys ákimi Ermaǵanbet Bólekpaev apparattyq keńeste málimdedi.
"Óziniń qyzmettik mindetterin tiisinshe oryndamaǵany úshin, atap aitqanda, jylytý maýsymyna daiyndyqty jetkiliksiz túrde baqylaǵany úshin meniń birinshi orynbasaryma eskertý túrinde tártiptik jaza qoldanylsyn. Saran qalasynyń ákimi men energetika jáne TKSh basqarmasynyń basshysyna qatań sógis jariialansyn. Qys mezgilinde sapaly jylýmen qamtamasyz etý mindeti biz úshin basym ekenin taǵy da eske salǵym keledi. Jumys turaqty túrde júrgizilýi kerek! Ár jaǵdai boiynsha qatań baǵa berilip, jaýapkershilik dárejesi anyqtalady", – dedi óńir basshysy.
Saran qalasynyń ákimi qaladaǵy jylý jaǵdaiy týraly baiandady. Onyń aitýynsha, barlyq jergilikti qazandyq shtattyq rejimde jumys istep tur, otyn qory qamtamasyz etilgen.
"Keibir úiler boiynsha qalalyq chatqa túsetin suraqtar jedel qaralady", - dep sendirdi Erkin Baýlyqov.
Aita keteiik, buǵan deiin Saran qalasynyń turǵyndary úilerinde jylý joǵyn aityp shaǵymdandy. Keiin bul másele Úkimet otyrysynda qaraldy.
"Bul – Saran qalasy ákiminiń jeke jaýapkershiligi jáne oblys ákimdigi tarapynan tiisti baqylaýdyń joqtyǵy", - dep synady Oljas Bektenov.
