Qaraǵandyda saqaldy jigit soqqyǵa jyqqan jedel járdem júrgizýshisi Tóreǵalı Berikqalıuly eldi shýlatqan oqıǵanyń qalaı bolǵanyn aıtyp berdi, dep habarlaıdy Dalanews.kz.
Onyń sózine qaraǵanda, qazirgi densaýlyǵym jaqsy. Murny men qabyrǵasy synǵan.
"Kózim ashylmaıdy. Bul vıdeodaǵy oqıǵa bylaı boldy,túngi 23:57-de bizge shaqyrtý túsip, bir jasar kishkentaı balanyń aýyryp qalǵany habarlandy. Sol úıge 5-7 mınýtta bardyq. Eki feldsher pasıentti qaraýǵa kirip ketti. Bir sátte bir aǵa feldsher shyǵyp, pasıentti alyp ketýge daıyn otyrǵanbyz. Sol sátte baıqasam, jedel járdem kóligi shaıqalady. Aınamen artyma qarasam, eshkim joq. Myna jaq aınaǵa qarasam, bir adam qolyndaǵy týmbochkasyn syıǵyza almaı kele jatyr eken. Men túsinbedim. Ol meni boqtaı bastady. Bastapqyda mán bermedim. Terezeme kelip, taǵy boqtady. Qaıtyp kelip, taǵy boqtady. Odan keıin men shyǵyp, nege boqtap jatqanyn suradym. «Nege kóligińdi bylaı qoıasyń» deıdi. Men adam aýyryp, shaqyrýymen kelgenimdi aıttym. «Meni kóre tura nege maǵan jol bermeısiń» dedi. Men «Sizdi kórgen joqpyn» dedim. Sóıtip, ol jigitke túsindirem degenshe úsh-tórt soqqy aldym, ol ketip qaldy. Pasıent shyqqanda kózim isip, júre almaı qaldym. Sóıtip basqa brıgada shaqyrdyq. Artynan polısıa keldi", – dedi ol.
Zardap shekken azamat barsha qazaq eline alǵysyn da jetkizdi. Sonymen qatar kópshilikten dárigerlerdiń eńbegine qurmetpen qaraýdy ótindi.
"Olardyń ár sekýnd, ár mınýty adam ómirin qutqarýda úlken rólge ıe! Qoldaýlaryńyzǵa úlken rahmet!" – deıdi jedel járdem júrgizýshisi.
Eske sala keteıik, Qaraǵandy turǵyny jedel járdem júrgizýshisin uryp-soqqan bolatyn. Polıseıler tóbelesken adamnyń kim ekenin anyqtady. Qazirgi ýaqytta shabýyl jasaǵan adamdy ustaý jumystary júrgizilip jatyr.
