Batys Qazaqstan oblysynda sot qaterli isikti der kezinde anyqtamaǵany úshin aýdandyq aýrýhanany qaitys bolǵan naýqastyń otbasyna moraldyq ótemaqy tóleýge mindettedi, dep habarlaidy dalanews.kz.
Oblystyq sottyń málimetinshe, 2023 jyldyń jeltoqsanynda Báiterek aýdanynyń turǵyny №2 aýdandyq aýrýhanaǵa jii qusý jáne nájisiniń qaraiýy boiynsha shaǵymdanyp júgingen. Alaida emdeý shamamen toǵyz aiǵa sozylyp, tek keiinirek oǵan onkologiialyq aýrý diagnozy qoiylǵan. Er adam 2024 jyldyń tamyz aiynda kóz jumǵan.
Sot dárigerdiń zerthanalyq taldaýlardyń nátijelerine tiisti baǵa bermegenin, klinikalyq hattamalardy saqtamaǵanyn, naýqasty beiindi mamandarǵa ýaqytyly jibermegenin jáne patogistologiialyq zertteý qorytyndysynan keiin onkologqa joldaýdy keshiktirgenin anyqtady.
Marqumnyń jubaiy men balasy moraldyq ziian úshin aýrýhanadan árqaisysyna 10 mln teńgeden óndirip berýdi suraǵan.
Sot talap aryzdy ishinara qanaǵattandyryp, «Báiterek aýdanynyń №2 aýrýhanasy» kommýnaldyq memlekettik kásipornyn talapkerlerdiń árqaisysyna 700 myń teńgeden ótemaqy tóleýge mindettedi.
Sot Azamattyq kodekstiń 921-babyna sáikes, qyzmetker eńbek mindetterin oryndaý barysynda keltirgen ziian úshin jumys berýshi jaýapty ekenin atap ótti. Osyǵan bailanysty qarjylyq jaýapkershilik meditsinalyq mekemege júkteldi.
Sot sheshimi ázirge zańdy kúshine engen joq.
