«Samuryq-Qazyna» AQ basqarma tóraǵasy Nurlan Jaqypov Shyǵys Qazaqstan oblysyna jumys sapary barysynda Óskemen qalasyndaǵy Ana men bala ortalyǵyna bardy, dep habarlaidy Dala News.
Ana men bala ortalyǵynda jasandy intellekt tehnologiialary men navigatsiialyq júie biriktirilgen Remebot RM-200 neirohirýrgiialyq operatsiialardy josparlaý roboty ornatylady. Bul júieniń engizilýi balalarǵa kórsetiletin mamandandyrylǵan neirohirýrgiialyq kómekti jańa tehnologiialyq deńgeige kóterýge múmkindik beredi.
Júie dárigerlerge operatsiia barysyn aldyn ala josparlap, naýqastyń miynyń dál 3D-modelin jasaýǵa jáne hirýrgiialyq aralasýdyń eń qaýipsiz traektoriiasyn anyqtaýǵa múmkindik beredi. Robottandyrylǵan manipýliator meditsinalyq quraldy belgilengen baǵytta millimetrdiń úlesine deiingi dáldikpen ustap turady. Bul saý tinderdiń zaqymdaný qaýpin azaityp, operatsiiadan keiingi asqynýlardyń aldyn alýǵa jáne patsientterdiń múgedektikke ushyraý qaýpin tómendetýge yqpal etedi.
Jańa jabdyqtyń iske qosylýy Shyǵys Qazaqstan, Pavlodar jáne Abai oblystarynyń turǵyndary úshin mamandandyrylǵan jáne joǵary mamandandyrylǵan neirohirýrgiialyq kómektiń sapasy men qoljetimdiligin arttyrýǵa múmkindik beredi. Epilepsiia, mi isikteri jáne júike júiesiniń basqa da aýrýlary bar balalar qajetti meditsinalyq kómek ala alady. Keshenniń jyldyq qýaty 500–750 operatsiiaǵa deiin jetedi. Jabdyqty ornatý jáne paidalanýǵa berý 2026 jyldyń tórtinshi toqsanyna josparlanǵan.
«Samuryq-Qazyna» korporativtik áleýmettik jaýapkershilikti adamdardyń ómir súrý sapasyna baǵyttalǵan uzaq merzimdi investitsiia retinde qarastyrady. 2023 jyldan beri Qor jalpy somasy 880 mlrd teńgeden asatyn 100-den astam áleýmettik mańyzy bar jobany iske asyrdy. Bul jumystyń eleýli bóligi densaýlyq saqtaý salasymen bailanysty: óńirlerde aýrýhanalar men meditsinalyq ortalyqtar salynyp, zamanaýi jabdyqtar satyp alynady. Balalardy ońaltýdy damytýǵa da erekshe kóńil bólinedi: búginde el boiynsha 55 ońaltý ortalyǵy ashylyp, 21 myńnan astam balaǵa kómek kórsetildi. Qordyń qoldaýynyń arqasynda óńirlerde joǵary tehnologiialyq meditsinalyq kómek qoljetimdi bola tústi. ShQO-daǵy búgingi joba - sonyń bir mysaly», – dedi Nurlan Jaqypov.
Sońǵy 10 jylda Shyǵys Qazaqstan oblysynda qaiyrymdylyqtyń biryńǵai operatory – «Samruk-Kazyna Trust» qory arqyly jalpy quny 1,9 mlrd teńgeni quraityn 25 joba júzege asyryldy. Óńirde balalar úileriniń 50 tárbielenýshisine arnalǵan Samruk Úmiti kásiptik baǵdar berý jobasy iske asyrylýda. Óskemen qalasynda úsh «Qamqorlyq» ońaltý ortalyǵy jumys isteidi. Sonymen qatar Shubarqudyq aýylynda aralas úlgidegi Ainala ortalyǵy qyzmet kórsetedi.
