QR Úkimeti "Samuryq-Qazyna" qorynyń dividend saiasatyna ózgeris engizdi. Tiisti qaýlyǵa Premer-ministr Oljas Bektenov 2025 jyly 3 maýsymda qol qoiǵan. Oǵan sáikes, Úkimet "Samuryq-Qazyna" memlekettik holdingi tóleýge mindetti jyl saiynǵy dividendterdiń eń tómengi mólsherin joiý týraly sheshim qabyldap otyr. Bir sózben aitqanda, bul qordyń dividentter tóleý talaptary jeńildetilgenin bildiredi, dep habarlaidy Dalanews.kz.
Úkimet Qaýlysynda atap kórsetilgendei, endi dividendterdi esepteý kezinde qordyń jalǵyz aktsioneri maquldaǵan jobalardy qarjylandyrý kólemi eskeriledi.
Qordyń Direktorlar keńesi jalǵyz aktsionerge qordyń shoǵyrlandyrylǵan taza kirisin bólý tártibi jáne bir jai aktsiiaǵa shaqqandaǵy dividend mólsheri týraly usynys usynady.
Esepti kezeńde jalǵyz aktsionerdiń sheshimderine sáikes, "Samuryq-Qazynanyń" júiequrýshy kompaniialarynyń tizimin qordyń direktorlar keńesi anyqtaityny jáne esepti kezeńde qor jobalaryn qarjylandyrý kólemin eskere otyryp, enshiles uiymdardan alynǵan dividendterdiń keminde 50 paiyzy memleketke tólenýge tiis.
Jalǵyz aktsionerdiń paidasyna dividendter somasyn esepteý kezinde aktsiialary (qatysý úlesteri) qorǵa tiesili zańdy tulǵalardan oǵan qor tobynyń aktivterin básekelestik ortaǵa berý jónindegi mámileler nátijesinde tólengen jáne Ulttyq qorǵa jiberilgen dividendter esepke alynbaidy.
Budan bólek, "Samuryq-Qazyna" ulttyq ál-aýqat qory endi úkimetke jyl saiyn keminde 25 milliard teńge kóleminde dividend tóleýge mindetti emes.
Osylaisha qujatta birqatar ózgerister engizilip, buǵan deiin kúshinde bolǵan 9 jáne 11-tarmaqtar alynyp tastaldy.
Atap aitqanda, burynǵy 9-tarmaqta esepti jyldyń qorytyndysy boiynsha jalǵyz aktsionerge tólenýge tiis dividendtiń eń tómengi mólsheri retinde 25 mlrd teńge kórsetilgen bolatyn. Al bul tarmaqtyń kúshin joiýy endi memlekettik qordyń dividendterdiń belgilengen shekti somasy boiynsha tólem jasaý mindettemesine súienbeitinin bildiredi.
Qaýly qol qoiylǵan kúninen bastap qoldanysqa engiziledi jáne 2025 jylǵy 1 qańtardan bastap týyndaǵan quqyqtyq qatynastarǵa qoldanylady.
Aita ketsek, qordyń jalǵyz aktsioneri Qazaqstan Úkimeti bolyp tabylady. 2024 jyly "Samuryq-Qazyna" qory Úkimetke 2023 jylǵy paida esebinen 158 mlrd teńge dividend tóledi. Buǵan qosa, maýsym aiynda qor 2022 jylǵy bólinbegen tabystan 63,5 mlrd teńge, sáýir aiynda 100 mlrd teńge, al 2023 jyldyń sońynda 238 mlrd teńge kóleminde dividend tóledi. Al 2024 jylǵy 20 qarashada "Samuryq-Qazyna" qory memleketke jalpy somasy 1,3 trln teńge kóleminde qarjy aýdarǵanyn habarlady. Bul somanyń ishinde 579 mlrd teńge respýblikalyq biýdjetke tólengen dividendterdi quraǵan. Mundaǵy somaǵa tek qana Qordyń emes, oǵan qarasty enshiles uiymdardyń da dividendteri kiredi.
Buǵan deiin saitymyzda "Ońbai synǵa ushyrap jatqan "Samuryq-Qazyna" aqyry ún qatty" degen material jariialanǵan bolatyn.
