Respublica partiiasy QB Almaty qalalyq filialynyń basshysy, kásipker Sholpan Ábdihalyqova QazGranit granit óńdeý zaýytyn satylymǵa shyǵardy. Bul týraly nysandy saýdalaýmen ainalysyp jatqan rieltordyń habarlamasynda aitylǵan, dep habarlaidy Dalanews.kz.
Jyljymaityn múlik agenttiginiń málimetine qaraǵanda Almatyda ornalasqan granit zaýyty tolyq daiyn biznes retinde usynylǵan. Nysan 1 gektar jer teliminde ornalasqan. Óndiristik ǵimarattyń aýmaǵy 330 sharshy metrdi, al keńse ǵimaratynyń kólemi 1 200 sharshy metr. Barlyq nysan kúrdeli qurylystan ótken jáne jumys isteýge tolyq daiyn kúide, delingen jarnamada. Zaýyt Almatynyń Alataý aýdanynda, Momyshuly men Móńkebi kósheleriniń qiylysynda ornalasqan.
Redaktsiia bul zaýyttyń iesi kim jáne ony satýdaǵy maqsat qandai degen saýalǵa jaýap izdep kórdi. Ashyq derekkózderinde, kásiporyn kontragent derekterine sáikes "QazGranit" JShS 2023 jyly 07 tamyzda qaita tirkeýden ótken. Qurylys materialdaryn kóterme baǵamen satý qyzmetin kórsetedi. Al onyń iesi retinde Ábdiǵappar Ásel Erjanqyzy kórsetilgen. Sondai-aq Ásel Ábdiǵappardyń atyna "City Stone" JShS 16 tamyz 2018 jyly rásimdelgen. Bul kompaniianyń Túrkistan oblysynda filialy tirkelgen. Atalǵan mekeme tas ónimderin kesý, óńdeý isimen ainalysady. Firma 2021 jyly 8 mln., 2023 jyly 9 mln., al 2024 jyly 14 mln. teńgege jýyq salyq tólese, 2025 jylǵy salyq túsimi 650 myń teńgege deiin quldyraǵan.
"QazGranit" JShS Ásel Ábdiǵappardyń atyna tirkelgenimen, negizgi iesi - Sholpan Asqarqyzy Ábdihalyqova. Ashyq derekkózderindegi kontragent derekterinde kórsetilgen telefon nomerleri osy adamǵa tirkelgen. Al Uchet.kz júiesinde jáne memlekettik satyp alý portalynda Ásel Ábdiǵappardyń atyna qurylys montaj jumysyn júrgizetin jáne basqa da birneshe firma tirkelgen. Atap aitqanda "A7 Project & Construction" JShS, "Nova Estate" JShS, "Fokstrot konsalting" JShS osy adamnyń atyna jazylǵan.
Sholpan Ábdihalyqova kásipker retinde Buqaralyq aqparat quraldaryna ondaǵan suqbat berip, ózin kóp jetistikke jetken kásipker retinde kórsetedi. Alaida ol eshbir kompaniiany óz atyna tirkemegen. Kásipker áiel ár suqbatynda tas qashaý "er adamdar isteitin" biznes ekenin jáne ony damytý ońai emes degendi maqtanyshpen aitady. Bir-birinen aiyrmashylyǵy joq imidjdik nemese jarnamalyq maqsattaǵy maqalalar men suqbattardan Qazaqstandaǵy tuńǵysh granit zaýytynyń tabysty iesi kim ekenin baiqaý qiyn emes. Sholpan Ábdihalyqovanyń buǵan deiingi ómirbaianynda bank-qarjy salasynda jáne AlmaTV kompaniiasynda jumys istegeni belgili. Al 2025 jyldyń mamyr aiynan beri Respublica partiiasy QB Almaty qalalyq filialynyń jetekshisi. Qaramaǵynda resmi túrde bir adam ǵana jumys isteitin qoǵamdyq birlestik janynan kásipker áielder keńesi qurylǵan. Alaida Sholpan Ábdihalyqovanyń jeke paraqshasynda partiianyń filialynda saiasi-qoǵamdyq nemese mádeni-áleýmettik salada atqarylyp jatqan is-sharalar týraly mardymdy aqparat joq. Negizinen áiel kásipkerlerdiń óńirlerdegi forýmdary men jiyndary týraly málimetterdi kórýge bolady.
Granit zaýytynyń jarnamalyq rolikterinde "Samuryq Qazyna" ulttyq kompaniiasymen tyǵyz jumys isteitindigi belgili boldy. Ásirese memlekettik mektepterge qajetti qasbettik jáne aýlaǵa tóseitin tastaqta ónimderin jetkizedi. Kásipkerler "City Stone" JShS-in 2025 jyly atyn ózgertip, "QazGranit" JShS degen atpen rebrending jasaǵan. "Jaily mektep" ulttyq jobasy aiasynda 15 qurylys kompaniiasy 127 myń sharshy metr granit ónimderin satyp alǵan. Kásiporyn jylyna 183 myń sharshy metr granit shyǵarsa, onyń edáýir bóligin memleket qarajatyna salynǵan bilim mekemelerin jaraqtandyrýǵa jibergen. Kompaniianyń áleýmettik jelide júktelgen imidjdik jáne jarnamalyq rolikterinde 2025-2026 jyldarǵa úlken josparlar qoiyp otyrǵany aitylady. Onda árbir aýla, árbir mektep jáne árbir qoǵamdyq alań bizdiń ónimdermen kómkeriledi delingen. Kásipker ári partiia qyzmetkeri Sholpan Asqarqyzy byltyr jyldyń sońynda Astanada ótken "Paryz" júldesin tabystaý kezinde memlekettik telearnalarǵa bergen suqbatynda granit, jiektas jáne brýschatka ónimderin Eýropa men Dýbaiǵa satýdy josparlap otyrǵanyn aitqan. Alaida arada bir ai ótkende zaýyttyń satylatyndyǵy týraly habarlama berilip jatyr.
Granit zaýytynyń quryltaishysy men kásiporyndy satylymǵa shyǵarǵan jyljymaityn múlik agenttigine redaktsiia atynan saýal joldandy.
