Prezident Qasym-Jomart Toqaev «Samuryq-Qazyna» qoryn artyq shtat pen tiimsizdik úshin synaǵanymen, qor qurylymdary júzdegen million teńgege zańgerlik qyzmet satyp alýdy jalǵastyryp jatyr, dep habarlaidy Dalanews.kz Qumash redaktsiiasyna silteme jasap.
Ashyq derekterge qaraǵanda, kvazimemlekettik sektordaǵy birneshe kompaniia zańgerlik qyzmetterge qomaqty qarjy bólgen:
- «QazaqGaz» – shamamen 900 mln teńge
- «Semei Energo» – 720 mln teńge (birneshe jylǵa)
- «AlES» – 148 mln teńge
- Qazaq Green Power – 300 mln teńgege jýyq
- Basqa jobalar men tenderlerdi qosa eseptegende, jalpy soma 3,5 mlrd teńgeden asady
Bul qarjy negizinen halyqaralyq quqyq, arbitraj jáne sheteldik kelisimderdi súiemeldeýge jumsalmaq.
Keibir konkýrstar birdei sharttarmen ótse de, nátijeleri ártúrli bolǵan. Mysaly, 749 mln teńgelik eki uqsas tenderdiń biri aiaqtalsa, ekinshisi keiinnen múlde jaramsyz dep tanylǵan.
Sondai-aq keibir jeńimpaz kompaniialardyń qor basshylyǵyna jaqyn adamdarmen bailanysy bar ekeni aitylyp otyr. Bul ashyqtyqqa qatysty suraqtardy kúsheitedi.
Toqaev qordaǵy «eshteńe istemei otyrǵan qyzmetkerlerdi» synap, reforma qajet ekenin aitqan. Alaida qazirgi jaǵdaiǵa qaraǵanda, iri shyǵyndar burynǵydai jalǵasyp jatyr.
Sarapshylardyń pikirinshe, milliardtaǵan teńgeniń zańgerlerge jumsalýy júiedegi eski tásilderdiń saqtalyp otyrǵanyn kórsetedi.
