پرەزيدەنت قاسىم-جومارت توقايەۆ «سامۇرىق-قازىنا» قورىن ارتىق شتات پەن تيىمسىزدىك ءۇشىن سىناعانىمەن، قور قۇرىلىمدارى جۇزدەگەن ميلليون تەڭگەگە زاڭگەرلىك قىزمەت ساتىپ الۋدى جالعاستىرىپ جاتىر، دەپ حابارلايدى Dalanews.kz Qumash رەداكسياسىنا سىلتەمە جاساپ.
اشىق دەرەكتەرگە قاراعاندا، كۆازيمەملەكەتتىك سەكتورداعى بىرنەشە كومپانيا زاڭگەرلىك قىزمەتتەرگە قوماقتى قارجى بولگەن:
- «QazaqGaz» – شامامەن 900 ملن تەڭگە
- «سەمەي ەنەرگو» – 720 ملن تەڭگە (بىرنەشە جىلعا)
- «الەس» – 148 ملن تەڭگە
- Qazaq Green Power – 300 ملن تەڭگەگە جۋىق
- باسقا جوبالار مەن تەندەرلەردى قوسا ەسەپتەگەندە، جالپى سوما 3،5 ملرد تەڭگەدەن اسادى
بۇل قارجى نەگىزىنەن حالىقارالىق قۇقىق، اربيتراج جانە شەتەلدىك كەلىسىمدەردى سۇيەمەلدەۋگە جۇمسالماق.
كەيبىر كونكۋرستار بىردەي شارتتارمەن وتسە دە، ناتيجەلەرى ءارتۇرلى بولعان. مىسالى، 749 ملن تەڭگەلىك ەكى ۇقساس تەندەردىڭ ءبىرى اياقتالسا، ەكىنشىسى كەيىننەن مۇلدە جارامسىز دەپ تانىلعان.
سونداي-اق كەيبىر جەڭىمپاز كومپانيالاردىڭ قور باسشىلىعىنا جاقىن ادامدارمەن بايلانىسى بار ەكەنى ايتىلىپ وتىر. بۇل اشىقتىققا قاتىستى سۇراقتاردى كۇشەيتەدى.
توقايەۆ قورداعى «ەشتەڭە ىستەمەي وتىرعان قىزمەتكەرلەردى» سىناپ، رەفورما قاجەت ەكەنىن ايتقان. الايدا قازىرگى جاعدايعا قاراعاندا، ءىرى شىعىندار بۇرىنعىداي جالعاسىپ جاتىر.
ساراپشىلاردىڭ پىكىرىنشە، ميللياردتاعان تەڭگەنىڭ زاڭگەرلەرگە جۇمسالۋى جۇيەدەگى ەسكى تاسىلدەردىڭ ساقتالىپ وتىرعانىن كورسەتەدى.
