«Samuryq-Qazyna» qory tobynyń biryńǵai qaiyrymdylyq operatory «Samruk-Kazyna Trust» qoldaýymen Jetisý óńirinde júzege asqan «Tabysty otbasy» áleýmettik jobasynyń túlekterine óndiristik tigin mashinalary, óndiristik peshter, óndiristik mikserler jáne basqa da qajetti qural-jabdyqtar túrindegi granttar berildi. Sonyń nátijesinde olar aspaz, elektr mehanigi, sulýlyq salonynyń mamany, tiginshi siiaqty birqatar kásipterdi bastaýǵa múmkindik aldy
Qural-jabdyq jiyntyqtaryn saltanatty túrde tabystaýǵa arnalǵan is-sharaǵa «Samuryq-Qazyna» AQ men onyń óńirlik enshiles kompaniialary jáne jergilikti atqarýshy organ ókilderi, joba jetekshileri men qoǵam qairatkerleri qatysty.
Jalpy atalǵan jobaǵa jergilikti jumyspen qamtýdy úilestirý jáne áleýmettik baǵdarlamalar basqarmasynyń kómegimen jumyssyzdar qataryndaǵy kóp balaly, múgedek bala asyrap otyrǵan, tolyq emes otbasylar jáne esh jerde oqymaityn, esh jerde jumys istemeitin jastar tartylǵan. Osylaisha jetisýlyq alǵashqy 24 túlek joba sheńberinde 1 ai biznes negizderine, qarjylyq saýattylyq, beiindik daiyndyqtan sabaq alyp, arnaiy óndiris oryndarynda is tájiribeden ótti. Qorytyndysynda árqaisynyń ashýǵa niet etken kásibine sai qural-jabdyqtar olarǵa tegin berilip otyr.
Saltanatty jiynda oblys ákiminiń orynbasary Rýstam Áli «Tabysty otbasy» jobasy Jetisý oblysy úshin áleýmettik jaǵdaidy, turǵyndardyń ómir súrý sapasyn jaqsartýdyń bir joly ári jeke kásibin ashýǵa niet etken turǵyndarǵa berilgen tamasha múmkindik ekenin aita kele, jobanyń barlyq túlekterin quttyqtap, olardyń bastamalarynyń tabysty bolýyna tilektestigin bildirdi.
– Bes oblystyń ishinde Jetisý oblysynyń ákimdigi usynǵan tizim aiasynda áleýmettik jelidegi marketing, tiginshilik, elektr mehanigi, sulýlyq salony mamany, aspazdyq kásipterin 1 aida alǵashqy leginiń 24 túlegi igerip, «Samuryq-Qazyna» qory atynan qural-jabdyq túrindegi qaitarymsyz grant alýǵa múmkindik ielenip otyr. Qazir oqýdyń ekinshi leginde 36 qatysýshy bilim alyp bastady, – dep atap ótti «Samruk-Kazyna Trust» KQ Qamqorshylyq keńesiniń múshesi Laýra Demesinova.
– Otbasynda 4 bala tárbielep otyrmyn. Ózim Eskeldi aýdanynyń turǵynymyn. Osyndai biregei jobaǵa qatysyp, jeke kásibimdi júrgizýge múmkindik alǵanyma qýanyshtymyn. Búgin men óndiristik tigin mashinasy men torlaǵysh mashinaǵa ie boldym. Osy kásipti meńgere bastaǵannan-aq maǵan tapsyrys túse bastaǵan. Endi tek otbasyma ǵana emes, basqa tutynýshylarǵa da jumys isteitin bolamyn, – deidi joba qatysýshysy A. Baimuhambetova.
Joǵaryda atalǵan bes aimaqqa barlyǵy 300 grant qarastyrylyp, «Samruk-Kazyna Trust» qory arqyly 200 mln teńgege jýyq qarjy bólindi. Joba kópbalaly analarǵa, erekshe qajettilikteri bar balalardy tárbielep otyrǵan otbasy múshelerine jáne az qamtylǵan otbasylarǵa, jastarǵa tikelei tabys tabýǵa naqty múmkindik beredi. Óz isin ashqysy keletin árbir qatysýshyǵa 150 AEK somasyna jabdyq óteýsiz beriledi.
Aldaǵy ýaqytta osy sekildi óz isin ashýǵa qajetti qural-jabdyqtar túrindegi grantty «Tabysty otbasy» jobasy aiasynda Ulytaý, Abai, Aqtóbe jáne Túrkistan oblystarynyń 114 túlegine tabystalady.
