«سامۇرىق-قازىنا» قورى توبىنىڭ ءبىرىڭعاي قايىرىمدىلىق وپەراتورى «Samruk-Kazyna Trust» قولداۋىمەن جەتىسۋ وڭىرىندە جۇزەگە اسقان «تابىستى وتباسى» الەۋمەتتىك جوباسىنىڭ تۇلەكتەرىنە وندىرىستىك تىگىن ماشينالارى، وندىرىستىك پەشتەر، وندىرىستىك ميكسەرلەر جانە باسقا دا قاجەتتى قۇرال-جابدىقتار تۇرىندەگى گرانتتار بەرىلدى. سونىڭ ناتيجەسىندە ولار اسپاز، ەلەكتر مەحانيگى، سۇلۋلىق سالونىنىڭ مامانى، تىگىنشى سياقتى ءبىرقاتار كاسىپتەردى باستاۋعا مۇمكىندىك الدى
قۇرال-جابدىق جيىنتىقتارىن سالتاناتتى تۇردە تابىستاۋعا ارنالعان ءىس-شاراعا «سامۇرىق-قازىنا» اق مەن ونىڭ وڭىرلىك ەنشىلەس كومپانيالارى جانە جەرگىلىكتى اتقارۋشى ورگان وكىلدەرى، جوبا جەتەكشىلەرى مەن قوعام قايراتكەرلەرى قاتىستى.
جالپى اتالعان جوباعا جەرگىلىكتى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ كومەگىمەن جۇمىسسىزدار قاتارىنداعى كوپ بالالى، مۇگەدەك بالا اسىراپ وتىرعان، تولىق ەمەس وتباسىلار جانە ەش جەردە وقىمايتىن، ەش جەردە جۇمىس ىستەمەيتىن جاستار تارتىلعان. وسىلايشا جەتىسۋلىق العاشقى 24 تۇلەك جوبا شەڭبەرىندە 1 اي بيزنەس نەگىزدەرىنە، قارجىلىق ساۋاتتىلىق، بەيىندىك دايىندىقتان ساباق الىپ، ارنايى ءوندىرىس ورىندارىندا ءىس تاجىريبەدەن ءوتتى. قورىتىندىسىندا ءارقايسىنىڭ اشۋعا نيەت ەتكەن كاسىبىنە ساي قۇرال-جابدىقتار ولارعا تەگىن بەرىلىپ وتىر.
سالتاناتتى جيىندا وبلىس اكىمىنىڭ ورىنباسارى رۋستام ءالي «تابىستى وتباسى» جوباسى جەتىسۋ وبلىسى ءۇشىن الەۋمەتتىك جاعدايدى، تۇرعىنداردىڭ ءومىر ءسۇرۋ ساپاسىن جاقسارتۋدىڭ ءبىر جولى ءارى جەكە كاسىبىن اشۋعا نيەت ەتكەن تۇرعىندارعا بەرىلگەن تاماشا مۇمكىندىك ەكەنىن ايتا كەلە، جوبانىڭ بارلىق تۇلەكتەرىن قۇتتىقتاپ، ولاردىڭ باستامالارىنىڭ تابىستى بولۋىنا تىلەكتەستىگىن ءبىلدىردى.
– بەس وبلىستىڭ ىشىندە جەتىسۋ وبلىسىنىڭ اكىمدىگى ۇسىنعان ءتىزىم اياسىندا الەۋمەتتىك جەلىدەگى ماركەتينگ، تىگىنشىلىك، ەلەكتر مەحانيگى، سۇلۋلىق سالونى مامانى، اسپازدىق كاسىپتەرىن 1 ايدا العاشقى لەگىنىڭ 24 تۇلەگى يگەرىپ، «سامۇرىق-قازىنا» قورى اتىنان قۇرال-جابدىق تۇرىندەگى قايتارىمسىز گرانت الۋعا مۇمكىندىك يەلەنىپ وتىر. ءقازىر وقۋدىڭ ەكىنشى لەگىندە 36 قاتىسۋشى ءبىلىم الىپ باستادى، – دەپ اتاپ ءوتتى «Samruk-Kazyna Trust» كق قامقورشىلىق كەڭەسىنىڭ مۇشەسى لاۋرا دەمەسىنوۆا.
سول سياقتى ۇيىمداستىرۋشىلار بيزنەسىن باستاعان ءار تۇلەكتىڭ ءىسىن ارى قاراي ىلگەرىلەتۋ ءۇشىن كەمىندە 3-4 اي قۇقىقتىق، كاسىپتىك جاعىنان اقىل-كەڭەس بەرىپ، قولداۋ كورسەتىپ وتىرماق. قايتارىمسىز قۇرال-جابدىققا يە بولعانداردىڭ ءبىرى – كوپ بالالى انا ايدا بايمۇحامبەتوۆا.
– وتباسىندا 4 بالا تاربيەلەپ وتىرمىن. ءوزىم ەسكەلدى اۋدانىنىڭ تۇرعىنىمىن. وسىنداي بىرەگەي جوباعا قاتىسىپ، جەكە كاسىبىمدى جۇرگىزۋگە مۇمكىندىك العانىما قۋانىشتىمىن. بۇگىن مەن وندىرىستىك تىگىن ماشيناسى مەن تورلاعىش ماشيناعا يە بولدىم. وسى كاسىپتى مەڭگەرە باستاعاننان-اق ماعان تاپسىرىس تۇسە باستاعان. ەندى تەك وتباسىما عانا ەمەس، باسقا تۇتىنۋشىلارعا دا جۇمىس ىستەيتىن بولامىن، – دەيدى جوبا قاتىسۋشىسى ا. بايمۇحامبەتوۆا.
جوعارىدا اتالعان بەس ايماققا بارلىعى 300 گرانت قاراستىرىلىپ، «Samruk-Kazyna Trust» قورى ارقىلى 200 ملن تەڭگەگە جۋىق قارجى ءبولىندى. جوبا كوپبالالى انالارعا، ەرەكشە قاجەتتىلىكتەرى بار بالالاردى تاربيەلەپ وتىرعان وتباسى مۇشەلەرىنە جانە از قامتىلعان وتباسىلارعا، جاستارعا تىكەلەي تابىس تابۋعا ناقتى مۇمكىندىك بەرەدى. ءوز ءىسىن اشقىسى كەلەتىن ءاربىر قاتىسۋشىعا 150 اەك سوماسىنا جابدىق وتەۋسىز بەرىلەدى.
الداعى ۋاقىتتا وسى سەكىلدى ءوز ءىسىن اشۋعا قاجەتتى قۇرال-جابدىقتار تۇرىندەگى گرانتتى «تابىستى وتباسى» جوباسى اياسىندا ۇلىتاۋ، اباي، اقتوبە جانە تۇركىستان وبلىستارىنىڭ 114 تۇلەگىنە تابىستالادى.
