«Samuryq-Qazyna» qory Memleket basshysy Qasym-Jomart Toqaevqa SKAI (Samruk-Kazyna Artificial Intelligence) neirojelisin – Direktorlar keńesiniń tsifrlyq táýelsiz múshesin tanystyrdy, dep habarlaidy Dalanews.kz.
SKAI - jasandy intellekt negizinde ázirlengen jáne óńir boiynsha Direktorlar keńesiniń daýys berý quqyǵy bar alǵashqy tsifrlyq táýelsiz múshesi. Tanystyrý rásimi Astanada Digital Bridge halyqaralyq forýmy aiasynda ótti.
SKAI korporativtik basqarýdyń ashyqtyǵy men sapasyn arttyrýdyń jańa quraly bolmaq. Neirojeli ishki jáne syrtqy normativtik qujattardy, 2008 jyldan bergi Direktorlar keńesiniń sheshimderin jáne Qordyń qurylǵan sátinen bastap jinaqtalǵan basqa da materialdardy taldaidy. Bul - Keńestiń áldeqaida utymdy ári saralanǵan sheshimder qabyldaýyna múmkindik beredi.
Qaýipsizdik te basty nazarda: SKAI Qordyń portfeldik kompaniiasy – «Qazaqtelekomnyń» ekinshi *sýperkompiýteri Al Farabium-nyń jabyq kontýrynda jumys isteidi. Osylaisha, aqparat el aýmaǵynan tysqary taramaidy, al joǵary esepteý qýaty taldaýdyń senimdiligi men jyldamdyǵyn qamtamasyz etedi. Júieniń negizi retinde qazaqstandyq Alem LLM tildik modeli qoldanylǵan.
«Jasandy intellekt negizindegi neirojeliniń Direktorlar keńesine taǵaiyndalýy – bul naǵyz kvanttyq serpilis: tehnologiia men adamdar sheshimdi birlese qabyldaidy, al tsifrlandyrý tek qana biznes-protsestermen shektelmei, basqarý filosofiiasynyń bir bóligine ainalýda», – dedi «Samuryq-Qazyna» AQ basqarma tóraǵasy Nurlan Jaqypov.
SKAI-dy Qordyń Direktorlar keńesiniń aldaǵy otyrysynda qoldaný josparlanǵan.
Neirojelini qoldanysqa engizý – Qordyń tsifrlandyrý men basqarýdy transformatsiialaýǵa baǵyttalǵan uzaq merzimdi strategiiasynyń bir bóligi.
