“Samuryq-Qazyna” qory “QazMunaiGaz” ulttyq kompaniiasynan Astanadaǵy keńse ǵimaratyn 28 mlrd teńgege satyp alǵan. Bul mámile 2024 jyldyń sońynda júzege asqan, dep habarlaidy Dalanews.kz.
Bul jónindegi aqparat Adata aqparattyq bazasynda jariialanǵan. Alaida kelisimsharttyń ózi qosa tirkelmegen. Ratel basylymy “Samuryq-Qazyna” qorynan satyp alynǵan ǵimarattyń tehnikalyq sipattamalary týraly suraýǵa tyrysqan.
Alaida qor ókilderi suraqtardyń basym bóligine jaýap bermei, tek mámileniń bolǵanyn rastady.
“Samuryq-Qazyna” AQ “QazMunaiGaz” AQ-dan keńse ǵimaratyn satyp alýdy korporativtik rásimder aiasynda júzege asyrǵanyn rastaidy. Kelisim qunyna ǵimarattyń ózimen qatar, onyń tolyqqandy jumys isteýi úshin qajetti barlyq jyljymaly múlik – keńse jabdyqtary, qaýipsizdik jáne injenerlik júieler de kirdi. Qazirgi tańda ǵimarat memlekettik menshikke berildi. Onyń negizgi paidalanýshylary – QR Energetika ministrligi men Sybailas jemqorlyqqa qarsy is-qimyl agenttigi”, – dep málimdedi qor ókilderi.
Alaida “Samuryq-Qazyna” ǵimarattyń memlekettik menshikke qandai sharttarmen berilgenin naqtylamady.
Qai ǵimarat týraly sóz bolyp otyr?
28 mlrd teńgege satyp alynǵan ǵimarat Astanada, Qabanbai batyr dańǵyly, 19 mekenjaiynda, A jáne B bloktarynda ornalasqan.
“Bul – ataqty “QazMunaiGaz” ákimshilik kesheni, ainalasyn shaǵylystyratyn áinekpen qaptalǵan, shpilderi men arkasy bar ǵimarat. Ol «Han Shatyr» saýda ortalyǵyna qarama-qarsy ornalasqan. BAQ derekterine súiensek, keshenniń jalpy aýdany 70 000 sharshy metr. Onyń birneshe bólek blogy bar, biiktigi 7 qabattan 18 qabatqa deiin jetedi”, – delingen basylym materialynda.
Ǵimarattyń ishinde ne bar?
Jýrnalisterdiń málimetinshe, ǵimarat ishinde konferents-zal, úlken ashana, trenajer zaly, tipti basketbol alańy da bar.
Al “QazMunaiGaz” týraly aitatyn bolsaq, kompaniianyń resmi saityndaǵy aqparatqa sáikes, olar burynǵy keńsesinen kóship, “Izýmrýdnyi kvartal” biznes ortalyǵyna ornalasqan.
