Qarjylyq monıtorıń agenttiginiń Astana qalasy boıynsha departamenti «Samruk-Kazyna Construction» AQ basqarýshy dırektory men «Dorstroıtrest» JSHS basshysyna qatysty tergep-tekserýdi aıaqtady, dep habarlaıdy Dalanews.kz.
Olar «Kók-Tóbe» kóppáterli turǵyn úı kesheniniń qurylysyna bólingen búdjet qarajatyn jymqyrdy degen kúdikke ilindi.
2022 jylǵy qańtarda «Samruk-Kazyna Construction» AQ men «Dorstroıtrest» JSHS arasynda qurylysqa ınvestısıa salý týraly kelisimshart jasalyp, 2,6 mlrd teńge kóleminde avans tólengen.
Alaıda qurylys jumystary belgilengen merzimde aıaqtalmaǵan jáne óreskel buzýshylyqtarmen júrgizilgen. Al avans kúdiktiler tarapynan qurylysqa qatysy joq qaryzdardy óteýge jáne avtokólik satyp alýǵa jumsalǵan.
Sonymen qatar, 650 mln teńge jalǵan sharttar arqyly kompanıalardyń shottaryna aýdarylyp, qolma-qol aqshaǵa aınaldyrylǵan.
Qylmystyq jolmen alynǵan kiriske 23 mln teńge turatyn eki avtokólik satyp alynyp, olardy tárkileýden jasyrý maqsatynda senimdi adamdardyń atyna rásimdelgen.
Sot sanksıasymen kúdiktilerdiń 170 mln teńge turatyn barlyq múlkine – 5 avtokólik pen Astanadaǵy páterge tyıym salyndy.
Kúdiktilerge qatysty qamaýda ustaý túrindegi bultartpaý sharasy tańdaldy.
«Samruk-Kazyna Construction» AQ-nyń burynǵy basqarýshy dırektory halyqaralyq izdeýge jarıalandy.
