"Jetisý" klýbynyń bas bapkeri Samat Smaqov "Qairattyń" 18 jastaǵy jas qaqpashysy Sherhan Qalmurzany asyra maqtaýdan saq bolýǵa shaqyrdy, dep habarlaidy Dalanews.kz.
Onyń aitýynsha, qoǵam men BAQ-tyń shamadan tys nazary jas sportshynyń mansabyna keri áser etýi múmkin.
"Aǵasy retinde men árqashan Sherhanmen sóilesip turamyn. Shyn aitaiyn, men oǵan klýbtyq baspasózden basqa eshkimge suhbat bermeýge keńes berdim. Sebebi onyń jasy nebári 18-de", – dedi Smaqov Sport.kz agenttigine bergen suqbatynda.
Bapkerdiń pikirinshe, artyq nazar men ataqqumarlyq jas sportshynyń psihologiialyq turǵyda kúireýine sebep bolýy yqtimal.
"Buǵan mysal - Erkebulan Seidahmet. "Ýfaǵa" aýysqanda “Erkebulan dárethanaǵa bardy”, “Erkebulan kofe satyp aldy” degen jańalyqtar shyqty. Aqyry sol qysym Erkebulandy tejedi. Mine, mundai nárse jas balany kúiretýi múmkin", – dedi ol.
Smaqov bul pikirin tek Sherhan Qalmurzaǵa emes, ózge de jas oiynshylarǵa qatysty ekenin aitty.
"Bul qatarda Aza (Azamat Tuiaqbaev), Dastan (Sátbaev) siiaqty daryndy jastar bar. Sondyqtan artyq kótermelemeý kerek. Olarǵa ýaqyt, tájiribe jáne tynyshtyq qajet", – dedi ol.
Bapkerdiń aitýynsha, jas sportshylardyń mansaby endi ǵana bastaldy.
"Bir-eki oiynnan keiin-aq balanyń búkil mansabyn syndyryp alýymyz ǵajap emes. Bundai mysaldar óte kóp. Sol sebepti aspandatýdyń qajeti joq. Áitpese, bir sátte bútin bir býyndy joǵaltyp alýymyz múmkin", – dep túiindedi Smaqov.
Eske sala keteiik, 30 qyrkúiekte Almatyda ótken "Qairat" pen "Real" arasyndaǵy tarihi matchta 18 jastaǵy Sherhan Qalmyrza álem nazaryna ilindi. Eýropalyq fýtbol qaýymdastyqtary odaǵy (ÝEFA) "Qairat" qaqpashysy Sherhan Qalmurzanyń seivin Chempiondar ligasynyń oiyn kúnindegi úzdikterdiń biri dep atady.
ÝEFA baspasóz qyzmeti jazba jariialap, onda jankúierlerden qai seivtiń úzdik bolǵanyn tańdaýdy surady.
Úzdik bestiktiń qataryna almatylyq komandanyń 18 jastaǵy qaqpashysynyń oiyny endi. Ol tarihi "Sportingke" qarsy matchtyń nebári besinshi minýtynda komandany qaýipti soqqydan qutqaryp qaldy.
