Prezident Qasym-Jomart Toqaev kelesi jyldy Jalpyhalyqtyq aýqymdy qurylys jyly dep jariialaýdy usyndy. Memleket basshysy bul bastamany jasandy intellekt dáýirindegi eldiń ortaq mindetimen bailanystyryp, infraqurylymdy jappai damytý qajettigin aitty, dep habarlaidy dalanews.kz.
Búgin, 28 qazanda Qazaqstan halqyna Joldaýyn jariialaǵan Qasym-Jomart Toqaev aldaǵy kezeńde elimizdiń barlyq óńirinde azamattyq infraqurylym nysandaryn salý jáne jóndeý jumystaryn jandandyrý kerektigin málimdedi.
«Osylaisha, jasandy intellekt dáýiriniń jaqyndaýyna bizdiń búkil halyq bolyp beretin ortaq jaýabymyz – salý, taǵy da salý!» – dedi Prezident.
Memleket basshysynyń aitýynsha, qurylys jumystary tek iri qalalarmen shektelmeýi kerek. Ár oblys ortalyǵynda, aýdandar men eldi mekenderde turǵyndardyń ómir súrý sapasyn jaqsartatyn nysandar boi kóterýge tiis.
Qandai nysandar salynady?
Prezidenttiń sózinshe, birinshi kezekte joldar, áýejailar, vokzaldar men densaýlyq saqtaý mekemeleriniń qurylysyn bastaý qajet. Onyń ishinde erekshe qajettiligi bar balalarǵa arnalǵan ońaltý ortalyqtaryn salýǵa da basymdyq beriledi.
Sonymen qatar barlyq óńirde shyǵarmashylyq úileri, sport keshenderi, kitaphanalar men ǵylymi ortalyqtar ashý kózdelip otyr. Turǵyn úi qurylysy da mańyzdy mindetterdiń biri bolyp qala beredi.
Toqaev bul bastamalardyń túpki maqsaty halyqtyń ál-aýqatyn arttyryp, ásirese óskeleń urpaqqa qolaily orta qalyptastyrý ekenin atap ótti.
Osylaisha, Prezident keler jylǵa arnalǵan aýqymdy qurylys bastamasyn eldiń áleýmettik jáne infraqurylymdyq damýynyń mańyzdy baǵyty retinde usyndy.
