Emhanany aralaý barysynda úmitker tek meditsina qyzmetkerlerimen ǵana emes, naýqastarmen de tildesti. Naýqastardyń biri dári-dármek baǵasynyń qymbat ekenine shaǵymdandy. Ol 1 kýrs em úshin tek inektsiiaǵa 40 000 teńgege jýyq qarajat jumsaǵanyn aitty.
«Kún ótken saiyn dári-dármek qymbattap barady! Jaqynda maǵan inektsiialar taǵaiyndaldy: 10 ret birden 3 ýkoldan alatyn boldym. Bir ampýlasy 1300 teńge turady. Meniń emime birden 30-y qajet boldy, bul - basqa preparattardy, shpritsterdi jáne basqa da shyǵyndardy eseptemegende shyǵatyn soma», - deidi emhanadaǵy patsientterdiń biri.
Taǵy bir naýqas aýrýhanaǵa qaralýǵa jazylýdyń ózi qiyn ekenin aitty.
«Mysaly, men kózimdi teksertkim keledi. Terapevtke jazylýym kerek, odan oftalmologqa barý kerek. Tikelei kóz dárigerine baryp qarala almaisyń, bárin terapevt arqyly jasaý kerek. Al terapevtke de, kóz dárigerine de uzyn-sonar kezek bar. Kabinetter arasynda júgirip júrip, sharshaisyń», - deidi ol.
Dárigerler de emdeý mekemelerindegi túitkildi máselelerdi jetkizdi
«Dárigerler, ásirese, kásibi mamandar tapshylyǵy bar. Jalaqy óte az. Biz patsientterdiń jaǵymsyz qarym-qatynasyn da únemi basymyzdan ótkizemiz. Bizdi basqa aýrýhanalar shaqyrady. Jeke klinikalarda jaǵdai áldeqaida jaqsy. Memlekettik emhanalar men aýrýhanalardaǵy áriptesterimizdiń kóbi tájiribe jinap, Densaýlyq saqtaý ministrliginiń buiryqtaryn jatqa oqyp, jekemenshik mekemelerge jumysqa ketip jatyr. Bul - dárigerler arasynda jii bolatyn qalypty jaǵdai», - dep bólisti dárigerlerdiń biri.
Quqyq qorǵaýshy Saltanat Tursynbekova memleket pen halyq yntymaqtasa jumys isteý kerektigin basa aitty.
Úmitkerdiń paiymynsha, dárigerler men meditsina qyzmetkerlerine jaqsylap eńbek jaǵdaiyn jasaý kerek, óitkeni azamattarymyzdyń ómiri osy mamandarymyzǵa tikelei bailanysty:
«Densaýlyq saqtaý júiesinde, meditsinaǵa qarjy bólýde barlyq jerde sheshimin tappaǵan máseleler kóp. Bul máselelerdi tez arada sheshý qajet dep esepteimin. Óitkeni, dárigerlerge jaqsy jumys jaǵdailary jasalǵanda, olar da naýqastarǵa oń áserin tigizedi. Munyń bári júieniń qalai durys qurylatynyna bailanysty», - deidi Saltanat Tursynbekova.
Eske salaiyq, Qostanai oblysy - kandidattyń sailaý aldyndaǵy úgit-nasihat saparlarymen barǵan jetinshi óńiri. Quqyq qorǵaýshy buǵan deiin elordada, Almaty, Shymkent qalalarynda jáne Qaraǵandy, Aqmola, Túrkistan oblystarynda bolǵan
