ەمحانانى ارالاۋ بارىسىندا ۇمىتكەر تەك مەديسينا قىزمەتكەرلەرىمەن عانا ەمەس، ناۋقاستارمەن دە تىلدەستى. ناۋقاستاردىڭ ءبىرى دارى-دارمەك باعاسىنىڭ قىمبات ەكەنىنە شاعىمداندى. ول 1 كۋرس ەم ءۇشىن تەك ينەكسياعا 40 000 تەڭگەگە جۋىق قاراجات جۇمساعانىن ايتتى.
«كۇن وتكەن سايىن دارى-دارمەك قىمباتتاپ بارادى! جاقىندا ماعان ينەكسيالار تاعايىندالدى: 10 رەت بىردەن 3 ۋكولدان الاتىن بولدىم. ءبىر امپۋلاسى 1300 تەڭگە تۇرادى. مەنىڭ ەمىمە بىردەن 30-ى قاجەت بولدى، بۇل - باسقا پرەپاراتتاردى، شپريستەردى جانە باسقا دا شىعىنداردى ەسەپتەمەگەندە شىعاتىن سوما»، - دەيدى ەمحاناداعى پاسيەنتتەردىڭ ءبىرى.
تاعى ءبىر ناۋقاس اۋرۋحاناعا قارالۋعا جازىلۋدىڭ ءوزى قيىن ەكەنىن ايتتى.
«مىسالى، مەن كوزىمدى تەكسەرتكىم كەلەدى. تەراپيەۆتكە جازىلۋىم كەرەك، ودان وفتالمولوگقا بارۋ كەرەك. تىكەلەي كوز دارىگەرىنە بارىپ قارالا المايسىڭ، ءبارىن تەراپيەۆت ارقىلى جاساۋ كەرەك. ال تەراپيەۆتكە دە، كوز دارىگەرىنە دە ۇزىن-سونار كەزەك بار. كابينەتتەر اراسىندا جۇگىرىپ ءجۇرىپ، شارشايسىڭ»، - دەيدى ول.
دارىگەرلەر دە ەمدەۋ مەكەمەلەرىندەگى تۇيتكىلدى ماسەلەلەردى جەتكىزدى
«دارىگەرلەر، اسىرەسە، كاسىبي ماماندار تاپشىلىعى بار. جالاقى وتە از. ءبىز پاسيەنتتەردىڭ جاعىمسىز قارىم-قاتىناسىن دا ۇنەمى باسىمىزدان وتكىزەمىز. ءبىزدى باسقا اۋرۋحانالار شاقىرادى. جەكە كلينيكالاردا جاعداي الدەقايدا جاقسى. مەملەكەتتىك ەمحانالار مەن اۋرۋحانالارداعى ارىپتەستەرىمىزدىڭ كوبى تاجىريبە جيناپ، دەنساۋلىق ساقتاۋ مينيسترلىگىنىڭ بۇيرىقتارىن جاتقا وقىپ، جەكەمەنشىك مەكەمەلەرگە جۇمىسقا كەتىپ جاتىر. بۇل - دارىگەرلەر اراسىندا ءجيى بولاتىن قالىپتى جاعداي»، - دەپ ءبولىستى دارىگەرلەردىڭ ءبىرى.
قۇقىق قورعاۋشى سالتانات تۇرسىنبەكوۆا مەملەكەت پەن حالىق ىنتىماقتاسا جۇمىس ىستەۋ كەرەكتىگىن باسا ايتتى.
ۇمىتكەردىڭ پايىمىنشا، دارىگەرلەر مەن مەديسينا قىزمەتكەرلەرىنە جاقسىلاپ ەڭبەك جاعدايىن جاساۋ كەرەك، ويتكەنى ازاماتتارىمىزدىڭ ءومىرى وسى ماماندارىمىزعا تىكەلەي بايلانىستى:
«دەنساۋلىق ساقتاۋ جۇيەسىندە، مەديسيناعا قارجى بولۋدە بارلىق جەردە شەشىمىن تاپپاعان ماسەلەلەر كوپ. بۇل ماسەلەلەردى تەز ارادا شەشۋ قاجەت دەپ ەسەپتەيمىن. ويتكەنى، دارىگەرلەرگە جاقسى جۇمىس جاعدايلارى جاسالعاندا، ولار دا ناۋقاستارعا وڭ اسەرىن تيگىزەدى. مۇنىڭ ءبارى جۇيەنىڭ قالاي دۇرىس قۇرىلاتىنىنا بايلانىستى»، - دەيدى سالتانات تۇرسىنبەكوۆا.
ەسكە سالايىق، قوستاناي وبلىسى - كانديداتتىڭ سايلاۋ الدىنداعى ۇگىت-ناسيحات ساپارلارىمەن بارعان جەتىنشى ءوڭىرى. قۇقىق قورعاۋشى بۇعان دەيىن ەلوردادا، الماتى، شىمكەنت قالالارىندا جانە قاراعاندى، اقمولا، تۇركىستان وبلىستارىندا بولعان
