Jelide eks-ministr Qýandyq Bishimbaevqa qatysty sot protsesinde jábirlenýshi tarap - Saltanat Núkenovanyń otbasynyń qorǵaýshysy bolǵan Janna Orazbahova jemqor degen aqparat tarady. Advokattyń ózi bul aiyptaýlarǵa jaýap berdi, - dep habarlaidy Dalanews.kz.
Telegramdaǵy VChK-OGPÝ derekkóziniń málimetinshe, Almaty advokattar alqasynyń múshesi Janna Orazbahovaǵa qatysty jábirlenýshilerden kóptegen shaǵym túse bastapty-mys.
"Mysaly, Orazbahovanyń ádisterinen zardap shekken jábirlenýshilerdiń biri óz oqiǵasyn aityp bergen. Jábirlenýshiniń qyzy zorlyq-zombylyq qurbany bolǵan. Oqiǵa bolǵannan keiin eki ai ishinde advokat Orazbahova qyzdyń otbasyna eki tańdaýdyń birin jasaý keregin aitqan: ne Jannanyń tanystaryna saraptama qorytyndysyn qajet sheshimmen shyǵarý úshin 30 000 dollar kóleminde aqsha jinaý kerek, ne qylmysker aqtalyp, bostandyqqa shyǵady", - delingen telegramdaǵy jazbada.
Taǵy bir jábirlenýshi, qarjy piramidalary isi boiynsha kýáger, Orazbahovanyń óz klienti Meirjandy qylmystyq jaýapkershilikten qutqarý úshin kýágerge aldymen para berip, keiin qorqytýǵa tyrysqanyn aitady.
"Budan bólek, Orazbahova qarjy piramidalarynyń barlyq salymshylaryn kináli etip kórsetýge tyrysqan. Óziniń áleýmettik jelileri men suhbattary arqyly qarjy piramidalaryn uiymdastyrýshylardy aqtap, bul áreketteri úshin olardan syiaqy alǵan. Sonymen qatar, derekkózdiń aitýynsha, Orazbahova klientterine qylmystyq jolmen alynǵan qarajatty kópshilikke qaitarý arqyly zańdastyrýǵa kómektesken. Buny ol jábirlenýshilerdiń qarajatyn qaitarý túrinde júzege asyrǵan", - delingen telegramda.
Taǵy birqatar jábirlenýshiler Orazbahovanyń óz media-resýrstary arqyly sotqa deiingi tergeý materialdaryn jariialap, adal tergeýshilerdi, prokýrorlar men sýdialardy qaralaýyn synǵa alypty.
Advojat Janna Orazbahovanyń ózi bul aiyptaýlarǵa jaýap berdi. Onyń sózinshe, bul - Soltústik Osetiiada jariialanǵan aqparat jáne advokatqa qarsy aqparattyq shabýyl jasalǵan.
"Eń qyzyǵy bul jańalyq pen onyń taqyryby jasandy intellekt kómegimen jasalǵan sekildi. Eger men sheneýnik nemese memlekettik qyzmetker bolmasam, jemqorlyqqa qandai qatysym bolýy múmkin? Qylmystyq kodekske sáikes, men qylmystyń bul túrine qatysty sýbektke jatpaimyn. Prokýrorlar men politsiiaǵa para beretinim de qyzyq eken. Eger bireýge qarsy material daiyndasa, ol adamdy aldymen zerttep alý qajet qoi. Men prokýrorlar men politseiler unatpaidy.
Taǵy bir qyzyǵy, men - tergeý izoliatoryna esirtki men telefon tasyp júr ekenmin. Odan bólek, áleýmettik jelidegi jazbalarym úshin qansha alatynymdy bildim: storis pen instagramdaǵy jazbaǵa 15000 dollardan alady ekenmin. Eń basty suraq, eger mundai aqshalardy alsam, nelikten Forbs tiziminde áli joqpyn? Mundai jańalyqtardy oqyp, bankte ipotekam bar ekenine uialyp kettim", - deidi advokat.
