Almatyda turǵyndar arasynda salaýatty ómir saltyn keńinen nasihattaýǵa baǵyttalǵan Almaty Move qalalyq jobasy bastaldy. Joba sportpen shuǵyldanýdy barynsha qoljetimdi etip, qala turǵyndaryn belsendi ómir saltyna tartýdy kózdeidi, dep habarlaidy dalanews.kz.
Búginde densaýlyqty saqtaý men fizikalyq belsendilikti arttyrý qoǵamnyń mańyzdy mindetteriniń birine ainaldy. Osyǵan bailanysty qolǵa alynǵan joba aiasynda ár demalys saiyn Almatynyń túrli qoǵamdyq keńistikterinde tegin sporttyq is-sharalar ótkiziledi. Olardyń qatarynda ioga, stretching, júgirý jattyǵýlary, skandinaviialyq júris, zýmba, emdik dene shynyqtyrý sabaqtary jáne balalarǵa arnalǵan sporttyq oiyndar bar.
Jobanyń ereksheligi – kez kelgen adamnyń arnaiy daiyndyqsyz qatysa alýynda. Barlyq sabaqtar ashyq aspan astynda ótkizilip, turǵyndarǵa óz úilerine jaqyn jerde jattyǵý jasaýǵa múmkindik beredi.
Joba uiymdastyrýshylarynyń biri - Svetlananyń aitýynsha, bastamanyń negizgi maqsaty – turǵyndardyń sportqa degen qyzyǵýshylyǵyn arttyryp, salaýatty ómir saltyn kúndelikti ádetke ainaldyrý.
– Almaty Move – qala turǵyndary úshin qolǵa alynǵan jańa bastama. Biz sportpen ainalysý úshin arnaiy daiyndyqtyń nemese qymbat abonementterdiń mindetti emes ekenin kórsetkimiz keledi. Sondyqtan barlyq is-sharalardy ashyq alańdarda ótkizemiz jáne olar barshaǵa tegin. Bizdiń missiiamyz – qozǵalysty ár adamnyń kúndelikti ómiriniń bir bóligine ainaldyrý. Sport qoljetimdi, qarapaiym ári qyzyqty bolýy kerek, – deidi uiymdastyrýshy.
Onyń aitýynsha, joba aiasynda ár ai belgili bir baǵytqa arnalady.
– Maýsym aiyn Balalardy qorǵaý kúnine orai balalarǵa arnalǵan belsendilikterge arnadyq. Animatorlardyń qatysýymen sporttyq estafetalar, komandalyq oiyndar jáne túrli interaktivter ótkizildi. Shilde aiynda ioga men stretching sabaqtaryna basymdyq berip otyrmyz. Máselen, búgin Birinshi Prezident fondy janyndaǵy saiabaqta stretching sabaǵy ótse, 28 panfilovshylar saiabaǵynda ioga jattyǵýy uiymdastyryldy. Sabaqtar bir ýaqytta ártúrli lokatsiialarda ótedi. Bul turǵyndarǵa ózderine yńǵaily oryndy tańdap, qatysýǵa múmkindik beredi, – deidi Svetlana.
Uiymdastyrýshynyń sózinshe, qatysýshylar úshin qajetti jaǵdailardyń barlyǵy jasalǵan.
– Ioga men stretching sabaqtaryna arnalǵan tósenishterdi ózimiz usynamyz. Degenmen, qatysýshylar qalaýyna qarai jeke tósenishterin ala kelýine bolady. Al tamyz aiynda turǵyndardy jańa sporttyq belsendilikter kútip tur. Barlyq aqparatty, sabaq kestesi men ótkiziletin oryndardy Almaty Move jobasynyń áleýmettik jelidegi paraqshasynda jariialap otyramyz, – deidi ol.
Mundai jobalar turǵyndardyń densaýlyǵyn nyǵaityp qana qoimai, otbasylyq demalystyń jańa mádenietin qalyptastyrýǵa, bos ýaqytty tiimdi ótkizýge jáne qoǵamda salaýatty ómir saltyn dáripteýge yqpal etedi.
