Belgili ánshi Sáken Maiǵazievtiń ulynyń úilený toiyn onlain formatta aqyly túrde kórsetýi salyq zańnamasyna sáikes tabys kózi retinde qarastyrylady. Bul týraly Memlekettik kirister komiteti málimdedi, dep habarlaidy Dalanews.kz "Nege.kz"-ke silteme jasap.
Bul qazaq qoǵamynda alǵash ret ótkizilgen aqyly onlain-toi retinde tirkeldi.
«Qaralyp otyrǵan jaǵdaida onlain-úilený toiyna qatysý úshin 1380 teńge kóleminde aqy alý tabys tabýǵa baǵyttalǵan kásipkerlik qyzmet bolyp sanalady. Eger sharany uiymdastyrýshy jeke kásipker nemese zańdy tulǵa retinde tirkelse, ol alǵan tabysyn deklaratsiialap, jeke tabys salyǵyn tóleýge mindetti», – delingen Komitet túsindirmesinde.
Iaǵni, bul tabys zań júzinde salyq salynatyn kiris retinde qaralady.
Eske salaiyq, tanymal ánshi Sáken Maiǵaziev kópshilikti uly Ádilet pen kelini Ádiianyń úilený toiyn onlain kórýge shaqyrdy.
Uiymdastyrýshylardyń málimetinshe, Ádilet pen Ádiianyń qýanyshyna arnaiy Telegram-arnasy ashylǵan. Toidy úiinde otyryp-aq tamashalaǵysy keletin jurt osy arnaǵa tirkelip, merekeniń eń jarqyn sátterin kóre alady.
"Ulymyzdyń úilený toiyn sizdermen bólisý úshin arnaiy jabyq Telegram-arnasyn ashtyq. Bul arnada toidyń erekshe ári qyzyqty sátterin onlain tamashalaýǵa múmkindik bar. Qýanyshymyzǵa ortaqtasyp, onlain toiymyzdyń qadirli qonaǵy bolýǵa shaqyramyz", – delingen habarlamada.
Telegram-arnaǵa tirkelip, toidyń onlain qonaǵy bolǵysy kelgenderge 1380 teńge tóleý qajet.
