Qazirgi sailaýaldy naýqan alǵashqy kúnderden-aq burynǵylardan aitarlyqtai erekshelenip otyr. Buryn úgit kezeńi kóbine resmi kezdesýler men baǵdarlamalardy tanystyrýmen shektelse, búginde partiialar áleýmettik jelilerdi belsendi igerip, dástúrli emes ashyq formattardy paidalanyp, básekelesterimen ashyq pikirtalasqa túsýde, dep habarlaidy dalanews.kz.
Úgit-nasihat naýqanynyń alǵashqy aptasynyń sońyna qarai partiialar óz baǵdarlamalaryn tanystyrý kezeńinen sailaýshylardyń nazaryn aýdarý jolyndaǵy neǵurlym belsendi básekege kóshýde. Sailaýaldy naýqan qarqyndy ári mazmundy sipat ala bastady.
«Ádilet» partiiasy birqatar jariia is-shara ótkizdi. Túrkistanda kásipkerlermen, agrarshylarmen jáne túrli sala ókilderimen kezdesýlerden keiin partiia kontserttik baǵdarlama men dron-shoý qamtylǵan keshki Open Air uiymdastyrdy. Is-sharalar barysynda dene shynyqtyrý jáne sport salasyna qatysty máseleler de kóterildi.
Jalpyulttyq sotsial-demokratiialyq partiia (JSDP) saraptamalyq pikirtalasqa basymdyq berip, sonymen birge básekelesteriniń baǵdarlamalaryn ashyq synǵa alǵan alǵashqy partiialardyń biri boldy. Dóńgelek ústelde partiia ókilderi birqatar partiia baǵdarlamalarynyń jekelegen erejelerin synǵa alyp, blogerler men shoý-biznes ókilderin partiialyq tizimderge engizý máselesine qatysty pikir bildirdi. Budan bólek, partiia skandinaviialyq júris boiynsha respýblikalyq sporttyq aktsiia ótkizdi. Aktsiia el óńirlerinde jalǵasady.
«Baitaq» jasyldar partiiasy óz naýqanyn ekologiialyq kún tártibi tóńireginde júrgizýdi jalǵastyrýda. Marafonnan bólek, partiia erekshe qorǵalatyn tabiǵi aýmaqtar júiesin damytýǵa, bioalýantúrlilikti saqtaýǵa jáne tabiǵat qorǵaý zańnamasyn jetildirýge arnalǵan saraptamalyq alań qurýǵa bastamashylyq etti. Osylaisha, partiia óziniń beiindi taqyrybyna berik ekenin kórsetti.
Qazaqstan Halyq partiiasy (QHP) eńbek ujymdarymen kezdesýler barysynda básekelesterdiń jekelegen usynystaryn synǵa aldy. Atap aitqanda, partiia ókilderi áleýmettik mańyzy bar azyq-túlik taýarlarynyń baǵasyn memlekettik retteýdi joiý jónindegi bastamalarǵa qarsy shyǵyp, JSDP baǵdarlamasynyń áleýmettik saiasat salasyndaǵy jekelegen erejelerin de synǵa aldy.
«Aýyl» partiiasy dástúrli qundylyqtar men halyqpen tikelei dialogqa basymdyq berýdi jalǵastyrýda. Respýblikalyq shtabyn ashqannan keiin partiia óńirlerde brendtelgen kiiz úiler ornata bastady. Sonymen qatar partiia ókilderi áleýmettik jelilerdegi tikelei efirlerdi belsendi paidalanyp, azamattardyń suraqtaryna jaýap berip qana qoimai, partiialyq tizimderdiń quramy men kadr saiasatyn synai otyryp, básekelesterimen ashyq pikirtalasqa túsýde.
Naýqannyń úshinshi kúnindegi eń eleýli oqiǵalardyń biri «Aq jol» men Respublicapartiialary arasyndaǵy ózara pikirtalas boldy. «Aq jol» ókilderi Respublica baǵdarlamasynyń jekelegen tezisteri partiia ókilderiniń is-áreketterine qanshalyqty sáikes keletinine kúmán keltirip, málimdelgen qaǵidattar men partiianyń keibir músheleriniń qoǵam aldyndaǵy beinesi arasyndaǵy qaishylyqtardy kórsetti. Buǵan jaýap retinde Respublica «Aq joldyń» ónerkásiptik saiasat salasyndaǵy usynystaryn jetkilikti pysyqtalmaǵan ári sybailas jemqorlyq táýekelderin qamtidy dep synap, sonymen qatar otandyq óndiristi damytý jónindegi óz kózqarasyn usyndy. Osylaisha, qazirgi ýaqytta osy eki partiia arasynda eń eleýli ashyq baǵdarlamalyq pikirtalas qalyptasty.
Jalpy, úgit naýqanynyń úshinshi kúni sailaý naýqanynyń neǵurlym qarqyndy kezeńge ótkenin kórsetedi. Partiialar dástúrli emes kommýnikatsiia formattaryn barǵan saiyn belsendi paidalanyp, tanymal saiasi beine qalyptastyrýǵa umtylyp, básekelesterimen mazmundy pikirtalasqa túsýde. Nátijesinde sailaýaldy naýqan mazmundy ári básekeli bola túsýde.
