Almaty ákimi Baqytjan Saǵyntaev I.V. Panfılov atyndaǵy №54 qazaqstandyq-reseılik mamandandyrylǵan mektep-lıseıdiń ǵımaratyn seısmıkalyq kúsheıtý barysymen tanysty. Kúrdeli jóndeý kezinde 1938 jyly salynǵan ǵımarattyń tarıhı qasbeti qalpyna keltirilip, ashyq sport alańy jańartyldy. Baqytjan Saǵyntaev jumystyń tez aıaqtalýyn jáne mekteptiń ýaqytynda paıdalanýǵa berilýin qamtamasyz etýdi tapsyrdy.
Orbıta-1 shaǵyn aýdanyndaǵy №60 mektep-gımnazıada 600 oryndy jańa korpýs salyndy. Bul osy mekteptegi oqýshy ornynyń tapshylyǵyn joıýǵa múmkindik berdi. Budan ózge, mektep aýmaǵynda jańarǵan sport alańy salyndy. Sonymen, burynnan bar sport zaldy eskersek, endi jańarǵan mektepte eki sport zal men ashyq sport alańy paıda boldy.
Aıta keterligi, Almatydaǵy 207 jalpy bilim beretin mektepterdiń barlyǵy sport zaldarmen 100% qamtylǵan. Sondaı-aq, bıyl 33 mekteptiń stadıonyn modernızasıalaýǵa 1 mlrd teńge bólinip otyr. Orta bilim berý júıesinde 110 myń balany qamtıtyn 3 721 sport seksıasy jumys isteıdi.
Sonymen qatar, memlekettik-jekemenshik áriptestik jobasy aıasynda bilim berý mekemeleriniń 8 sport alańy qaıta jańǵyrtylýda. Buǵan deıin MJÁ jobalary aıasynda eki mektep aýmaǵyndaǵy sport alańdary jańarǵan edi.
Qala ákimi Baqytjan Saǵyntaev oqýshylar arasynda koronavırýstyq ınfeksıanyń taralýyn boldyrmaý úshin mektepterdiń sanıtarlyq qaýipsizdigin qamtamasyz etýdi tapsyrdy. Densaýlyq jaǵdaıyna baılanysty emdeletinderdi qospaǵanda, memlekettik bilim berý uıymdarynyń barlyq qyzmetkerleri 100% vaksınalanǵan.
Dástúrli bilim berý formatyna kóshý úshin mektepterde, balabaqshalarda, ınternattarda koronavırýstyq ınfeksıanyń taralýyn boldyrmaý sharalary júrgizilýde. Barlyq uıymdar jýǵysh jáne dezınfeksıalyq quraldarmen, sondaı-aq antıseptıktermen jabdyqtalǵan.
Oqý barlyq sanıtarlyq-epıdemıologıalyq talaptardy saqtaı otyryp uıymdastyrylady, onyń ishinde termometrıa, vızýaldy tekserý, efır, kvars. Oqýshylar aǵyny bastaýysh, orta jáne joǵary býyn bolyp bólinedi.
Baqytjan Saǵyntaev sonymen qatar Qonaev kóshesi, 127 mekenjaıdaǵy 3 jasqa deıingi balalardyń erte aralasýyna arnalǵan ońaltý ortalyǵynyń ǵımaratyn rekonstrýksıalaý jobalarymen tanysty. Munda týa bitkennen bastap bir jasqa deıin týa bitken jáne tuqym qýalaıtyn aýrýlary bar balalar baqylanyp, ońaltýdan ótedi. Jobanyń basty maqsaty – balalar arasyndaǵy aýrýshańdyq pen múgedektikti tómendetý.
Qala basshysy Qonaev kóshesi, 122 mekenjaıdaǵy ǵımaratty da qarap shyqty. Buryn munda qalalyq Áleýmettik ál-aýqat basqarmasy ornalasqan bolatyn, basqarma Áleýmettik qyzmetter úıine kóshken edi. Endi nysan 18 jastan asqan múgedekterge arnalǵan kópsalaly ońaltý ortalyǵyna jáne aýtızmi bar balalarǵa qoldaý kórsetý ortalyǵyna aınalady. Jobany qazan aıynda aıaqtaý josparlanǵan.
