Qazaqstannyń bilim jáne ǵylym ministri Erlan Saǵadievtiń málimdeýinshe, qazaq-túrik litseileri jumysyn jalǵastyra beredi. Bul týraly ol Astanada tamyz jinalysynda aitty.
«Qazaqstan prezidentiniń qaýlysyna sáikes, bilim jáne ǵylym ministrliginiń komissiiasy quryldy. Biz túrik tarapymen bailanysyp otyramyz, biraq bunyń oqý protsesine qatysy bolmaidy. Qazaqstandyq bul [túrik litseileri] mektepter jergilikti standarttarmen jumys isteidi. Biz olardy birneshe márte tekserdik. Olarǵa eshqandai synymyz joq, jumystaryn jalǵastyrady beredi", - dedi Saǵadiev.
5 tamyzda Ankaraǵa saparmen barǵan Qazaqstan prezidenti Nursultan Nazarbaev: túrik din ýaǵyzdaýshy Fethýllah Gúlenmen "terrorlyq bailanysy" bar ekeni dáleldense, "Qazaqstan qazaq-túrik litseiinde jumys isteitin kez kelgen adamdy Túrkiiaǵa qaitaryp beredi", - dep málimdegen edi. Ankara Gúlendi shildedegi búlikti uiymdastyrǵan dep aiyptady.
Túrkiia prezidenti Rejep Taiyp Erdoǵan Qazaqstanda "Gúlenmen bailanysy bar" 33 mektep jumys isteidi dep málimdegen edi. Erdoǵan Astanadan sol mekterge qatysty shara qoldanýyn suraǵan edi.
Qazaqstandaǵy 29 qazaq-túrik litseiin, "Nur Orda" jekemenshik mektebin, eki kolledjdi, sondai-aq Súleimen Demirel atyndaǵy Ýniversitetti halyqaralyq KATEV qory qarjylandyrady. Ol 1997 jyly bilim salasyndaǵy áriptestik týraly úkimetaralyq kelisim negizinde qurylǵan edi.
