Senat spıkeri Máýlen Áshimbaev Kıevte qazaqstandyq jýrnalıs Aıdos Sadyqovqa jasalǵan shabýylǵa qatysty pikir bildirdi, - dep habarlaıdy Dalanews.kz.
Senat spıkeri "memlekettik organdardyń osy oqıǵaǵa qatysy bolýy múmkin" degen aqparattar arandatý ekenin aıtty.
"Qazaqstannyń, bizdiń keıbir memlekettik organdardyń qatysy bar degen kez kelgen málimdeme - shyndyqqa janaspaıtyn arandatýshylyq. Osyǵan oraı Memleket basshysy ustanymyn naqty aıtyp, jaǵdaıǵa qatysty pikir bildirdi. Búginde Qazaqstanda barlyq másele quqyqtyq jaǵynan, elimizdiń zańdary aıasynda sheshiledi. Memleket basshysy Aıdos Sadyqov pen onyń jubaıy Qazaqstan azamattary ekenin eskere otyryp, olardyń quqyǵyn qamtamasyz etý jóninde qajet sharalar qabyldaýdy tapsyrdy", - dedi Máýlen Áshimbaev Senat kýlýarynda.
Ol elimizdiń Bas prokýratýrasy tergeýge atsalysyp jatqanyn jáne Ýkraınadaǵy áriptesterimen baılanysta ekenin aıtty.
"Bul jaǵdaıda Qazaqstan jýrnalısiń kózin qurtýǵa múddeli boldy degen qandaı da bir málimdemeler shyndyqqa saı kelmeıdi, bul - Qazaqstandy geosaıası oıyndarǵa tartýdaǵy tikeleı arandatýshylyq. Bul tustaǵy ustanym eldiń zańdaryna sáıkes aıqyn, naqty", - dedi Áshimbaev.
Sonymen qatar, Áshimbaev Sadyqovqa shabýyl jasady degen kúdiktiler ustalýyna qatysty pikir bildirdi, olardyń biri Qazaqstan azamaty degen aqparat bar.
"Qazaqstan óz azamattaryn basqa memleketterge bermeıdi. Bul qaǵıda kez kelgen jaǵdaıda qoldanylady. Naqty osy jaǵdaıǵa keletin bolsaq, meniń oıymsha, eki el bul isti tergep, barlyq dálel men elimizdiń zańdaryna tolyq sáıkes keletin sheshimdi qarastyrady", - dedi Áshimbaev.
Aıdos Sadyqov Ýkraınada resmı bosqyn mártebesin alǵan. Al 2023 jyldyń qazan aıynda Sadyqovqa Qazaqstanda "áleýmettik, ulttyq, rýlyq, tektik-toptyq nemese dinı alaýyzdyqty qozdyrǵany" úshin izdeý jarıalanǵan bolatyn.
Buǵan deıin Ermurat Bapı Aıdos Sadyqovty jaqsy biletinin, al "Báse" qatardaǵy opozısıalyq resýrs ekenin aıtty. Sondaı-aq, depýtat bul qastandyqqa Qazaqstan bıliginiń reaksıasy jóninde, Qazaqstannyń endigi áreketi qandaı bolatyny týraly pikir bildirdi.
"Sadyqovtardyń kásibı, saıası kózqarasy qalaı bolǵany mańyzdy emes. Eń mańyzdysy ol - Qazaqstan azamaty. Qaı jerden baryp saıası baspana alsa, ol - ekinshi kezektegi másele. Sondyqtan Qazaqstannyń bıligi, Qazaqstannyń tıisti memlekettik organdary Ýkraına tarapyna shyǵyp, bul máselege aralasýy kerek, suraý salýy kerek. Bul halyqaralyq dárejede rezonans alǵan oqıǵa ǵoı. Bir eldiń azamatyn ekinshi bir elde atyp ketý degen, onyń ústine jýrnalıs bolsa, opozısıalyq resýrstyń jetekshisi bolsa, mindetti túrde Qazaqstannyń tarapy aralasýy kerek. Ekinshiden, Qazaqstannyń buǵan eshqandaı da qatysy joq ekenin dáleldeýi kerek qoı. Qazaqstan tarapy únsiz qalatyn bolsa, onda basqa da pikir týýy múmkin. Qazaqstannyń bıligi bul iske mindetti túrde aralasyp, istiń mán-jaıyn bilýge áreket etýi kerek degen oıym bar", - dedi Bapı.
Al Prezıdent Qasym-Jomart Toqaev Qazaqstan bul is boıynsha tergeýge qatysýǵa daıyn ekenin aıtty.
"Elimizde Zań ústemdigin nyǵaıtyp jatyrmyz, ıaǵnı barlyq salada, eń aldymen, Zań ústemdigin qamtamasyz etý – basty mindet. Bul másele boıynsha meniń kózqarasym – aıqyn. Muny ózderińiz de jaqsy bilesizder. Qazaqstanda Zań men tártip bárinen bıik turýǵa tıis. Sondyqtan qoǵamdaǵy barlyq qarama-qaıshylyqtar men kelispeýshilikterdi tek qana quqyqtyq turǵydan, ıaǵnı tıisti Zańnamaǵa jáne negizgi halyqaralyq normalarǵa sáıkes sheshý qajet. Keshe Qazaqstan azamaty Aıdos Sadyqovqa qatysty Kıevte bolǵan qylmysqa da dál osy ustanym turǵysynan qaraǵan jón. Men dıplomatıalyq arnalar men quqyq qorǵaý organdary arqyly osy oqys oqıǵa boıynsha resmı suratýlar jiberý týraly naqty tapsyrma berdim. Sondaı-aq qajet bolǵan jaǵdaıda Qazaqstannyń resmı organdary istiń aqıqatyna jetýge járdem berý úshin tergeý jumysyna qatysýǵa daıyn ekenin aıtqym keledi, – dedi Prezıdent."
