سەنات سپيكەرى ماۋلەن اشىمبايەۆ كييەۆتە قازاقستاندىق جۋرناليست ايدوس سادىقوۆقا جاسالعان شابۋىلعا قاتىستى پىكىر ءبىلدىردى، - دەپ حابارلايدى Dalanews.kz.
سەنات سپيكەرى "مەملەكەتتىك ورگانداردىڭ وسى وقيعاعا قاتىسى بولۋى مۇمكىن" دەگەن اقپاراتتار ارانداتۋ ەكەنىن ايتتى.
"قازاقستاننىڭ، ءبىزدىڭ كەيبىر مەملەكەتتىك ورگانداردىڭ قاتىسى بار دەگەن كەز كەلگەن مالىمدەمە - شىندىققا جاناسپايتىن ارانداتۋشىلىق. وسىعان وراي مەملەكەت باسشىسى ۇستانىمىن ناقتى ايتىپ، جاعدايعا قاتىستى پىكىر ءبىلدىردى. بۇگىندە قازاقستاندا بارلىق ماسەلە قۇقىقتىق جاعىنان، ەلىمىزدىڭ زاڭدارى اياسىندا شەشىلەدى. مەملەكەت باسشىسى ايدوس سادىقوۆ پەن ونىڭ جۇبايى قازاقستان ازاماتتارى ەكەنىن ەسكەرە وتىرىپ، ولاردىڭ قۇقىعىن قامتاماسىز ەتۋ جونىندە قاجەت شارالار قابىلداۋدى تاپسىردى"، - دەدى ماۋلەن اشىمبايەۆ سەنات كۋلۋارىندا.
ول ەلىمىزدىڭ باس پروكۋراتۋراسى تەرگەۋگە اتسالىسىپ جاتقانىن جانە ۋكرايناداعى ارىپتەستەرىمەن بايلانىستا ەكەنىن ايتتى.
"بۇل جاعدايدا قازاقستان ءجۋرناليستىڭ كوزىن قۇرتۋعا مۇددەلى بولدى دەگەن قانداي دا ءبىر مالىمدەمەلەر شىندىققا ساي كەلمەيدى، بۇل - قازاقستاندى گەوساياسي ويىندارعا تارتۋداعى تىكەلەي ارانداتۋشىلىق. بۇل تۇستاعى ۇستانىم ەلدىڭ زاڭدارىنا سايكەس ايقىن، ناقتى"، - دەدى اشىمبايەۆ.
سونىمەن قاتار، اشىمبايەۆ سادىقوۆقا شابۋىل جاسادى دەگەن كۇدىكتىلەر ۇستالۋىنا قاتىستى پىكىر ءبىلدىردى، ولاردىڭ ءبىرى قازاقستان ازاماتى دەگەن اقپارات بار.
"قازاقستان ءوز ازاماتتارىن باسقا مەملەكەتتەرگە بەرمەيدى. بۇل قاعيدا كەز كەلگەن جاعدايدا قولدانىلادى. ناقتى وسى جاعدايعا كەلەتىن بولساق، مەنىڭ ويىمشا، ەكى ەل بۇل ءىستى تەرگەپ، بارلىق دالەل مەن ەلىمىزدىڭ زاڭدارىنا تولىق سايكەس كەلەتىن شەشىمدى قاراستىرادى"، - دەدى اشىمبايەۆ.
ايدوس سادىقوۆ ۋكراينادا رەسمي بوسقىن مارتەبەسىن العان. ال 2023 جىلدىڭ قازان ايىندا سادىقوۆقا قازاقستاندا "الەۋمەتتىك، ۇلتتىق، رۋلىق، تەكتىك-توپتىق نەمەسە ءدىني الاۋىزدىقتى قوزدىرعانى" ءۇشىن ىزدەۋ جاريالانعان بولاتىن.
بۇعان دەيىن ەرمۇرات باپي ايدوس سادىقوۆتى جاقسى بىلەتىنىن، ال "باسە" قاتارداعى وپپوزيسيالىق رەسۋرس ەكەنىن ايتتى. سونداي-اق، دەپۋتات بۇل قاستاندىققا قازاقستان بيلىگىنىڭ رەاكسياسى جونىندە، قازاقستاننىڭ ەندىگى ارەكەتى قانداي بولاتىنى تۋرالى پىكىر ءبىلدىردى.
"سادىقوۆتاردىڭ كاسىبي، ساياسي كوزقاراسى قالاي بولعانى ماڭىزدى ەمەس. ەڭ ماڭىزدىسى ول - قازاقستان ازاماتى. قاي جەردەن بارىپ ساياسي باسپانا السا، ول - ەكىنشى كەزەكتەگى ماسەلە. سوندىقتان قازاقستاننىڭ بيلىگى، قازاقستاننىڭ ءتيىستى مەملەكەتتىك ورگاندارى ۋكراينا تاراپىنا شىعىپ، بۇل ماسەلەگە ارالاسۋى كەرەك، سۇراۋ سالۋى كەرەك. بۇل حالىقارالىق دارەجەدە رەزونانس العان وقيعا عوي. ءبىر ەلدىڭ ازاماتىن ەكىنشى ءبىر ەلدە اتىپ كەتۋ دەگەن، ونىڭ ۇستىنە جۋرناليست بولسا، وپپوزيسيالىق رەسۋرستىڭ جەتەكشىسى بولسا، مىندەتتى تۇردە قازاقستاننىڭ تاراپى ارالاسۋى كەرەك. ەكىنشىدەن، قازاقستاننىڭ بۇعان ەشقانداي دا قاتىسى جوق ەكەنىن دالەلدەۋى كەرەك قوي. قازاقستان تاراپى ءۇنسىز قالاتىن بولسا، وندا باسقا دا پىكىر تۋۋى مۇمكىن. قازاقستاننىڭ بيلىگى بۇل ىسكە مىندەتتى تۇردە ارالاسىپ، ءىستىڭ ءمان-جايىن بىلۋگە ارەكەت ەتۋى كەرەك دەگەن ويىم بار"، - دەدى باپي.
ال پرەزيدەنت قاسىم-جومارت توقايەۆ قازاقستان بۇل ءىس بويىنشا تەرگەۋگە قاتىسۋعا دايىن ەكەنىن ايتتى.
"ەلىمىزدە زاڭ ۇستەمدىگىن نىعايتىپ جاتىرمىز، ياعني بارلىق سالادا، ەڭ الدىمەن، زاڭ ۇستەمدىگىن قامتاماسىز ەتۋ – باستى مىندەت. بۇل ماسەلە بويىنشا مەنىڭ كوزقاراسىم – ايقىن. مۇنى وزدەرىڭىز دە جاقسى بىلەسىزدەر. قازاقستاندا زاڭ مەن ءتارتىپ بارىنەن بيىك تۇرۋعا ءتيىس. سوندىقتان قوعامداعى بارلىق قاراما-قايشىلىقتار مەن كەلىسپەۋشىلىكتەردى تەك قانا قۇقىقتىق تۇرعىدان، ياعني ءتيىستى زاڭناماعا جانە نەگىزگى حالىقارالىق نورمالارعا سايكەس شەشۋ قاجەت. كەشە قازاقستان ازاماتى ايدوس سادىقوۆقا قاتىستى كييەۆتە بولعان قىلمىسقا دا ءدال وسى ۇستانىم تۇرعىسىنان قاراعان ءجون. مەن ديپلوماتيالىق ارنالار مەن قۇقىق قورعاۋ ورگاندارى ارقىلى وسى وقىس وقيعا بويىنشا رەسمي سۇراتۋلار جىبەرۋ تۋرالى ناقتى تاپسىرما بەردىم. سونداي-اق قاجەت بولعان جاعدايدا قازاقستاننىڭ رەسمي ورگاندارى ءىستىڭ اقيقاتىنا جەتۋگە جاردەم بەرۋ ءۇشىن تەرگەۋ جۇمىسىنا قاتىسۋعا دايىن ەكەنىن ايتقىم كەلەدى، – دەدى پرەزيدەنت."
