Ridder qalasynda memlekettik mekemeler, kásiporyndar jáne áleýmettik qyzmetter úshin jumys kestesi ózgerdi. Endi jumys kúni 08:00-den 17:30-ǵa deiin jalǵasady, al túski úzilis 12:00-den 13:30-ǵa deiin belgilendi, dep habarlaidy Dalanews.kz
Jańashyldyqqa oblystyń 13 ákimshilik birliginiń 12-si qoldaý kórsetti. Bul bastamaǵa Ridder de qosyldy.
Bul bastama eńbek úderisterin ońtailandyrýǵa jáne aimaqtyń klimattyq jaǵdailaryn eskere otyryp, jumys tiimdiligin arttyrýǵa baǵyttalǵan. Alaida bul ózgeris mektepterge, balabaqshalarǵa jáne meditsinalyq mekemelerge áser etken joq.
Jergilikti turǵyndardyń pikirinshe, jańa jumys kestesi yńǵaily ári aldyn ala boljamdy.
«Bul durys jáne ýaqytyly sheshim. Birinshiden, qaýipsizdik turǵysynan alǵanda tańerteń qarańǵyda jumysqa barý qajet emes. Ekinshiden, tańǵy ýaqytta ónimdilik joǵary, jumys isteý jeńilirek ári jyldamyraq», – deidi qala turǵyny Liazzat Shaiahmetova.
Jergilikti turǵyn Olga Vahrameeva de jańa jumys ýaqytyn quptady.
«Men jańa jumys kestesin quptaimyn, óitkeni bul óte yńǵaily. Jańa tártip balabaqshalardyń jumys ýaqytymen jaqsy úilesedi, olar 08:00-de ashylady. Erte bastasaq – erte aiaqtaimyz, bul otbasymyzǵa kóbirek ýaqyt bólýge múmkindik beredi»,- dep atap ótti Olga Vahrameeva.
Ridder qalasy ákiminiń orynbasary Bolat Akýjanov jańa jumys kestesi turǵyndarmen talqylanǵanyn atap ótti.
«Biz ridderliktermen birqatar kezdesýler ótkizip, bul máseleni talqyladyq. Qala turǵyndary bul bastamany qoldady. Jańa jumys kestesi ýaqytty tiimdi basqarýǵa jáne jumys pen jeke ómir arasyndaǵy tepe-teńdikti saqtaýǵa kómektesedi dep oilaimyn»,- dedi Bolat Akýjanov.
Jalpy, jańa jumys tártibi qala turǵyndary arasynda oń kózqaras týdyrdy. Bul ózgeris eńbek pen jeke ýaqyt arasyndaǵy úilesimdilikti jaqsartyp, jumys tiimdiligin arttyrýǵa yqpal etedi.
