Shymkent qalasy ákiminiń orynbasary qazirgi ýaqytta esin biledi. Bul týraly ony búgin aýrýhanada arnaiy baryp kórgen Májilis depýtaty Bolatbek Áliev málimdedi. Ol resmi aqparatqa ǵana senýge shaqyryp, tergeý barysy baqylaýda ekenin atap ótti, dep habarlaidy Dalanews.kz.
Al bloger Beibit Álibekovtyń aitýynsha, aldaǵy ýaqytta Almatydan kelgen dárigerlermen konsiliým ótkizý josparlanyp otyr.
Eske sala keteiik, 21 sáýirde Shymkent qalasy ákimdigi ǵimaraty mańynda atys boldy. Saldarynan Rýslan Berdenov jaraqat aldy. Politsiia málimetinshe, kúdikti ustalyp, ýaqytsha ustaý izoliatoryna qamalǵan, bul derek boiynsha qylmystyq is qozǵalǵan.
Al Densaýlyq saqtaý ministrligi málimetinshe, Rýslan Berdenovke operatsiia jasalǵan, ómirine qaýip joq.
"Shymkent qalasy ákiminiń orynbasary oq jaraqatymen qalalyq aýrýhanaǵa tústi. Oǵan shuǵyl operatsiia jasaldy. Operatsiia barysynda qan ketý toqtatyldy, zaqym qalpyna keltirildi. Ómirine qaýip joq", - dep jazylǵan habarlamada.
Málimetke súiensek, onyń jaǵdaiy turaqty aýyr dep baǵalanady. Sheneýnik dárigerlerdiń turaqty baqylaýynda jáne qajet meditsinalyq kómekti alyp jatyr.
