«Ogneýporsnab» JShS basshysy Azamat Murtazin Prezident Qasym-Jomart Toqaevqa jáne Bas prokýror Berik Asylovqa beineúndeý jazyp, óz kompaniiasyna qarsy qylmystyq istiń qoldan jasalǵanyn málimdedi. Kásipkerdiń aitýynsha, qolynda Bas prokýratýranyń zańsyz qozǵalǵan isti toqtatý jónindegi tapsyrmasy bar, alaida Qostanai oblysynyń prokýratýrasy ony elemei otyr, dep habarlaidy Dalanews.kz.
Murtazinniń kompaniiasy Rýdnyida inertti qaldyqtardy qaita óńdeýmen ainalysady.
Kásipkerdiń aitýynsha, onyń qolynda 2025 jyldyń 24 mamyrynda Bas prokýratýradan Qostanai oblysy prokýrorynyń birinshi orynbasary Baýyrjan Bekbosynovqa joldanǵan tapsyrma bar.
Qujatta ekonomikalyq tergeý departamenti qozǵaǵan qylmystyq istiń zańsyz ekeni tórt bet boiy dáleldengen.
«Bul iste eshqandai aiǵaq ta, qylmys quramy da joq. Naqty zalal joq. Soǵan qaramastan, 2025 jyldyń 29 mamyryna deiin qylmystyq isti toqtatyp, laýazymdy tulǵalardy tártiptik jaýapkershilikke tartý týraly tapsyrma oryndalmai qaldy», – delingen málimdemede.
Murtazin sondai-aq Bas prokýrordyń birinshi orynbasary Timýr Tashimbaevqa jáne tergeý basshysy Sanat Tolqymbaevqa júgingenin, alaida olardyń da qol qoiǵan qujattary oryndalmai qalǵanyn aitty.
«Shaǵyn jáne orta kásipker retinde meniń quqyqtarym qorǵalmai otyr. Bas prokýratýrany óz tapsyrmasyn oryndaýǵa jáne onyń talaptaryn Qostanai oblysyndaǵy qadaǵalaýshy organǵa jetkizýge shaqyramyn», – dep atap ótti biznesmen.
Sóziniń sońynda ol memleket basshysyna da ún qatty:
«Qasym-Jomart Kemeluly, siz bizge kásipkerlik erkindigi men biznesti qorǵaýǵa kepildik berdińiz. Men sizden osy jaǵdaiǵa aralasýyńyzdy, biznesimdi jáne ózimdi quqyq qorǵaý organdary arqyly meni básekeles retinde joiýǵa baǵyttalǵan jalǵan qylmystyq isten qorǵaýyńyzdy suraimyn», – dedi Azamat Murtazin.
