«وگنەۋپورسناب» ج ش س باسشىسى ازامات مۇرتازين پرەزيدەنت قاسىم-جومارت توقايەۆقا جانە باس پروكۋرور بەرىك اسىلوۆقا بەينەۇندەۋ جازىپ، ءوز كومپانياسىنا قارسى قىلمىستىق ءىستىڭ قولدان جاسالعانىن مالىمدەدى. كاسىپكەردىڭ ايتۋىنشا، قولىندا باس پروكۋراتۋرانىڭ زاڭسىز قوزعالعان ءىستى توقتاتۋ جونىندەگى تاپسىرماسى بار، الايدا قوستاناي وبلىسىنىڭ پروكۋراتۋراسى ونى ەلەمەي وتىر، دەپ حابارلايدى Dalanews.kz.
ءمۇرتازيننىڭ كومپانياسى رۋدنىيدا ينەرتتى قالدىقتاردى قايتا وڭدەۋمەن اينالىسادى.
كاسىپكەردىڭ ايتۋىنشا، ونىڭ قولىندا 2025 جىلدىڭ 24 مامىرىندا باس پروكۋراتۋرادان قوستاناي وبلىسى پروكۋرورىنىڭ ءبىرىنشى ورىنباسارى باۋىرجان بەكبوسىنوۆقا جولدانعان تاپسىرما بار.
قۇجاتتا ەكونوميكالىق تەرگەۋ دەپارتامەنتى قوزعاعان قىلمىستىق ءىستىڭ زاڭسىز ەكەنى ءتورت بەت بويى دالەلدەنگەن.
«بۇل ىستە ەشقانداي ايعاق تا، قىلمىس قۇرامى دا جوق. ناقتى زالال جوق. سوعان قاراماستان، 2025 جىلدىڭ 29 مامىرىنا دەيىن قىلمىستىق ءىستى توقتاتىپ، لاۋازىمدى تۇلعالاردى تارتىپتىك جاۋاپكەرشىلىككە تارتۋ تۋرالى تاپسىرما ورىندالماي قالدى»، – دەلىنگەن مالىمدەمەدە.
مۇرتازين سونداي-اق باس پروكۋروردىڭ ءبىرىنشى ورىنباسارى تيمۋر تاشيمبايەۆقا جانە تەرگەۋ باسشىسى سانات تولقىمبايەۆقا جۇگىنگەنىن، الايدا ولاردىڭ دا قول قويعان قۇجاتتارى ورىندالماي قالعانىن ايتتى.
«شاعىن جانە ورتا كاسىپكەر رەتىندە مەنىڭ قۇقىقتارىم قورعالماي وتىر. باس پروكۋراتۋرانى ءوز تاپسىرماسىن ورىنداۋعا جانە ونىڭ تالاپتارىن قوستاناي وبلىسىنداعى قاداعالاۋشى ورگانعا جەتكىزۋگە شاقىرامىن»، – دەپ اتاپ ءوتتى بيزنەسمەن.
ءسوزىنىڭ سوڭىندا ول مەملەكەت باسشىسىنا دا ءۇن قاتتى:
«قاسىم-جومارت كەمەل ۇلى، ءسىز بىزگە كاسىپكەرلىك ەركىندىگى مەن بيزنەستى قورعاۋعا كەپىلدىك بەردىڭىز. مەن سىزدەن وسى جاعدايعا ارالاسۋىڭىزدى، بيزنەسىمدى جانە ءوزىمدى قۇقىق قورعاۋ ورگاندارى ارقىلى مەنى باسەكەلەس رەتىندە جويۋعا باعىتتالعان جالعان قىلمىستىق ىستەن قورعاۋىڭىزدى سۇرايمىن»، – دەدى ازامات مۇرتازين.
