"Bul istiń saiasi ekeni belgili, saiasi básekelester bir-birlerimen sottasyp jatyr", - dep málimdedi Qyrǵyzstannyń eks-prezidenti Roza Otýnbaeva. Ol beisenbi kúni Bishkektegi Birinshi mai sotyna kelip, "Ata Meken" partiiasynyń lideri Ómirbek Tekebaev pen Qyrǵyzstannyń Ońtústik Koreiadaǵy eks-elshisi Dýishenbek Chotonovtarǵa qatysty túsinikteme berdi.
Biraq eks-prezidenttiń sózderin sýdia bólip, tek kórgen-bilgenińizdi ǵana aityńyz dedi.
Roza Otýnbaevaǵa "2010 jyldyń 12-13 mamyrynda ýaqytsha úkimet músheleri qaida boldy, memlekettik múlik máselelerimen, atap aitqanda "Megakommen" ("Alfa Telekom" JAQ) kim ainalysty?" degen suraqtar qoiyldy.
Bul suraqtarǵa eks-prezident: "Mysaly, Almazbek Atambaev birinshi orynbasar boldy, áleýmettik-ekonomikalyq suraqtarǵa jaýap berdi. Temir Sariev qarjy-ekonomikalyq máselelerge jaýapty boldy. Ómirbek Tekebaev konstitýtsiialyq reformamen, Azimbek Beknazarov quqyqtyq jáne qaýipsizdik máselelerimen ainalysty. Biraq 13 mamyrdan keiin biz qaýipsizdik máselelerin Almazbek Atambaevqa berdik. Ol ózi osyndai bastama kóterdi. Memlekettik múlik jáne jekeshelendirý máselesimen ainalysqan Atambaev",- dep jaýap berdi.
Ómirbek Tekebaev pen Dýishenbek Chotonovqa korrýptsiia isine qatysty qylmystyq is qozǵaǵan. Bul iske negiz bolǵan reseilik biznesmender Aleksei Modin men Leonid Maevskiidiń aryzdary. Olar Ómirbek Tekebaevqa "Megakom" kompaniiasyn ielený úshin 1 mln dollar para bergenderin aitqan.
