"Qazatomónerkásip" ulttyq atom kompaniiasy" AQ reseilik seriktestiń keibir birlesken kásiporyndardan shyqqanyn málimdedi, dep jazady Dalanews.kz.
"Rosatom" memlekettik korporatsiiasynyń kompaniialar tobyna kiretin "Ýraniým Ýan Grýp" AQ-tyń túpki benefitsiary State nuclear Uranium Resources Development Co., Ltd (QHR) kompaniiasy bolyp tabylady. Ol SNURDC Astana Mining Company Limited kompaniiasynyń paidasyna "Zarechnoe" BK" AQ-nyń aktsiialarynyń ózine tiesili 49,979%-yn satty. Bul rette osy birlesken kásiporyndaǵy Qazatomónerkásiptiń qatysý úlesi ózgergen joq jáne ol 49,979%-dy quraidy", delingen ulttyq kompaniia habarlamasynda.
"Zarechnoe" BK" AQ 1977 jyly ashylǵan Túrkistan oblysyndaǵy Zarechnoe ken ornynda ýran óndirisimen ainalysady. Ken ornyndaǵy ýran qory 2024 jyldyń basynda shamamen 3,5 myń tonnany quraǵan. Ken ornyn igerýdi aiaqtaý 2028 jylǵa josparlanyp otyr.
Sondai-aq "Ýraniým Ýan Grýp" AQ "Horasan-U" BK" JShS-tiń jarǵylyq kapitalyna qatysý úlesiniń 30%-yn jáne "Qyzylqum" JShS-tiń jarǵylyq kapitalyna qatysý úlesiniń 30%-yn mámile taraptary ony jabý rásimderin aiaqtaǵan jaǵdaida túpki benefitsiary China General Nuclear Power Corporation (CGN, QHR) bolyp tabylatyn China Uranium Development Company Limited kompaniiasynyń paidasyna satady dep kútiledi. Osy birlesken kásiporyndarda Qazatomónerkásiptiń qatysý úlesi ózgermeidi, "Horasan-U" BK" JShS-te 50% jáne "Qyzylqum" JShS-te 50% (janama) deńgeide saqtalady.
"Horasan-U" BK" JShS Qyzylorda oblysynyń Jańaqorǵan aýdanyndaǵy Soltústik Harasan ken ornynyń "Harasan-1" ýchaskesinde ýran óndirýdi júzege asyrady. Ken ornynyń qorlary 2024 jyldyń basyndaǵy jaǵdai boiynsha paidalaný merzimi 2038 jylǵa deiingi 33 myń tonnaǵa jýyq ýrandy quraidy. "Horasan-U" BK" JShS-te óndirilgen búkil ýran tikelei sol igerilip jatqan ýchaskeniń ózinde ornalasqan "Qyzylqum" JShS-tiń óndiristik qýattarynda qaita óńdeledi. "Qyzylqum" JShS jer qoinaýyn paidalaný quqyǵyna ie emes jáne tek ýrandy qaita óńdeý boiynsha qyzmetterdi júzege asyrady.
Aita ketsek, 2024 jyldyń ózinde Qazatomónerkásip perspektivaly ýchaskelerde ýrandy barlaýǵa tórt jańa litsenziia aldy, olardy kompaniia tek óz kúshterimen oryndaýdy josparlap otyr. Aldyn ala baǵalaýlar boiynsha, osy perspektivaly ýchaskelerdegi jalpy boljamdy resýrstar 180 myń tonnadan asady.
