«Rosatom» memlekettik korporatsiiasynyń bas direktory Aleksei Lihachiov pen Mysyr Arab Respýblikasynyń elektr energetikasy jáne jańartylatyn energiia kózderi ministri Mahmýd Esmat Nijnii Novgorodta kezdesý ótkizdi. Kún tártibindegi negizgi másele — Mysyrdaǵy alǵashqy «El-Dabaa» AES-iniń qurylys barysy boldy, dep Atom Media-ǵa silteme jasap Dalanews habarlaidy.
Taraptar atqarylyp jatqan jumystardyń qarqynyna oń baǵa berdi. Aita keteiik, biyl shildede stantsiianyń ekinshi energoblogyndaǵy reaktor korpýsy jobalyq ornyna saltanatty túrde ornatylǵan bolatyn. Jospar boiynsha AES óziniń alǵashqy elektr energiiasyn 2028 jyly bere bastaidy.
Basshylar negizgi qurylyspen qatar energetikalyq jáne energetikaǵa jatpaityn salalardaǵy seriktestikti keńeitý múmkindikterin de qarastyrdy. Atap aitqanda, sý tushytý stantsiiasyn salý, sondai-aq Mysyrda iadrolyq meditsina men additivti tehnologiialar ortalyqtaryn ashý máseleleri sóz boldy.
Mysyrdaǵy alǵashqy «El-Dabaa» AES-i Jerorta teńiziniń jaǵalaýynda, Kairden 300 shaqyrym jerdegi Matrýh provintsiiasynda boi kóterip jatyr. Joba jiyntyq qýaty 4800 MVt bolatyn «3+» býynyndaǵy reseilik VVER-1200 reaktorlary bar tórt energoblokty qamtidy. 2017 jylǵy kelisimsharttarǵa sáikes, Resei tarapy qurylystan bastap otyn jetkizýge, mamandardy oqytýǵa jáne paidalanylǵan otyndy saqtaý obektilerin salýǵa deiingi tolyq qoldaýdy qamtamasyz etedi.
2025 jylǵy qarashada «Rosatom» men Mysyr Elektr energetikasy ministrligi qol qoiǵan keshendi baǵdarlama seriktestikti jańa deńgeige shyǵardy. Bul qujat ǵylymi-tehnikalyq yntymaqtastyqty nyǵaityp, Mysyr ekonomikasynyń túiindi salalarynda jańa jobalardy iske qosýǵa jol ashady.
