QR Premer-ministriniń birinshi orynbasary Roman Skliar Syr eline jumys sapary aiasynda shaǵyn ónerkásip aimaqtaryna baryp, jańa jobalar men óndiris alańdaryn kórdi. Oblys ákimi Nurlybek Nálibaev aldymen «Jolaýshylar vagondaryn jóndeý, tehnikalyq qyzmet kórsetý kesheni jáne vagon qurastyrý zaýytynyń» jobasymen tanystyrdy, – dep habarlaidy Dalanews.kz Qyzylorda oblysy ákiminiń baspasóz qyzmetine silteme jasap.
Investitsiialyq jobanyń quryltaishysy «Maral-Nur» JShS direktory Murat Nursaitovtyń aitýynsha, 15,4 mlrd teńge investitsiia salynatyn joba 2 kezeńde júzege asady.
Birinshi kezeńde jylyna 560 jolaýshylar vagonyn aǵymdaǵy jóndeý, 180 vagon depo jóndeý kesheni josparlanǵan. Qurylys 100% aiaqtaldy, qazir ishki árleý jumystary qarqyn aldy. Reseiden 60 jabdyq jetkizilip, montajdalýda.
Seriktestik buǵan shamamen 3,2 mlrd teńge jeke investitsiia saldy. Odan bólek, jobany «Damý» kásipkerlikti damytý qory» AQ 2,2 mlrd teńgege qarjylandyrdy. Paidalanýǵa berý 2025 jyldyń II toqsanyna josparlanǵan.
Ekinshi kezeńde jańa tehnologiialardy paidalanyp vagon qurastyratyn óndiris qurylmaq. Ol – jylyna 30-40 vagon shyǵaratyn «Qyzylorda vagon qurastyrý zaýyty». Daiyndyq jumystary osy jyldyń ekinshi jartyjyldyǵynda bastalady. Reseiden jáne QHR-dan jabdyqtar satyp alýǵa qajetti 8 mlrd teńge «Ónerkásipti damytý qory» AQ arqyly qarastyrylýda.
«Tumar» jáne «Tehosnastka-Remservis» shaǵyn ónerkásip aimaqtary jobasynyń tehnikalyq seriktesi – «Ónerkásipti damytý qory», «Baiqońyr» ÁKK AQ. Bul aýmaqtan aýyl sharýashylyǵy, azyq-túlik ónimderin shyǵarý josparlanýda. Sút ónimderin, jartylai fabrikattardy, nan-toqash ónimderin óndiretin aimaqta 10-80 jumysshy eńbek etedi. Qazirgi ýaqytta irgetasy quiylyp, baǵanalary ornatylǵan.
Aita keteiik, «Aýyl amanaty» jobasy aiasynda sońǵy eki jylda 601 joba júzege asyrylyp, 917 jańa jumys orny quryldy. Biyl 815 joba sheńberinde 1 myńnan astam jumys orny ashylmaq. Sonymen qatar, sharýashylyq qurylymdarynyń áleýmettik jaýapkershiligi aiasynda kásibin bastaýshylardy ǵimaratpen, kepildikpen qamtamasyz etý tájiribesi engizildi.
