Qazaqstan bıyl jyl sońyna deıin temirjol tasymaly salasyna qajetti 175 jańa jolaýshylar vagonyn satyp almaq, dep habarlaıdy Dalanews.kz.

Bul týraly Úkimette ótken brıfıńte birinshi vıse-premer Roman Sklár málimdedi.

Baspasóz máslıhatynda Sklár Prezıdent tapsyrmalary aıasynda eldegi kólik ınfraqurylymyn damytý baǵytynda atqarylyp jatqan jumystar týraly baıandady.

«Búginde respýblıkada birqatar aýqymdy temirjol jobalary iske asyrylýda. «Dostyq – Moıynty» jáne «Almaty aınalma temirjol jelisi» jobalary aıaqtalýǵa jaqyn. Aldaǵy jyly «Moıynty – Qyzyljar» jáne «Darbaza – Maqtaaral» jelileri iske qosylady. 2027 jyly «Baqty – Aıagóz» temirjoly paıdalanýǵa beriledi», – dedi Roman Sklár.

Úkimet basshysynyń orynbasary jańa temirjol jelileri júk pen jolaýshylar tasymalyn arttyryp, el ekonomıkasyna oń yqpal etetinin atap ótti. Sondaı-aq, jańa vagondardyń iske qosylýy jolaýshylar tasymalynyń sapasyn aıtarlyqtaı jaqsartady dep kútilýde.