Jýyrda Beijińde ótken erekshe jarys kópshiliktiń nazaryn aýdardy. Honor Lightning atty robot jartylai marafon qashyqtyǵyn 50 minýt 26 sekýndta baǵyndyrdy. Bul nátije adamzattyń álemdik rekordynan shamamen 7 minýtqa jyldam.
Atalǵan oqidan keiin kópshilik arasynda "robottar sportta adamdy almastyra ala ma?" degen saýal týyndady. Alaida sarapshylar buǵan birjaqty baǵa berýge bolmaitynyn jetkizdi, dep habarlaidy Dalanews.kz.
Jańa báseke emes, jańa baǵyt
Sport salasynyń mamany, Qazaq Expert Club sarapshysy Evgenii Azarev bul qubylysty adam men mashina arasyndaǵy tikelei báseke dep qarastyrý qate ekenin aitady.
"Bul – jańa sanattyń, iaǵni tehnologiialyq sporttyń paida bolýy. Adamnyń da, robottyń da múmkindikteri men shekteýleri ártúrli – olardy bir ólshemmen salystyrý orynsyz", – deidi sarapshy.
Bir jyldaǵy serpilis
Sarapshynyń sózinshe, basty nazar aýdaratyn nárse – nátijeden buryn, tehnologiianyń damý qarqyny.
Bir jyl buryn, iaǵni 2025 jyly, mundai robottar dál osy qashyqty 2 saǵat 40 minýtta áreń eńsergen. Al búginde bul ýaqyt úsh ese qysqarǵan.
"Bul – tehnologiialardyń jai tájiribelik kezeńnen shyǵyp, naqty qoldanýǵa bolatyn deńgeige jetkenin kórsetedi. Iaǵni, jekelegen jetistik emes, tutas bir jańa indýstriia qalyptasyp keledi", - dep túsindirdi Azarev.
Robottardyń artyqshylyǵy nede?
Sarapshy robottardyń artyqshylyǵyna da toqtaldy. Onyń sózinshe, adam aǵzasy sharshaý, qyzyp ketý jáne fiziologiialyq shekteýlerge táýeldi. Al robottarda mundai kedergiler joq.
"Salqyndatý júieleri men turaqty mehanikasynyń arqasynda olar adamǵa qoljetimsiz qarqyndy ustap tura alady. Bul – olardyń basty artyqshylyǵy", – deidi ol.
Jappai tehnologiia
Sondai-aq bul qubylystyń aýqymy da mańyzdy. Atalǵan jarysqa 100-den astam robot qatysqan. Sonyń shamamen 40 paiyzy tolyq avtonomdy rejimde áreket etken.
"Bul bir jyl burynǵydai sirek kezdesetin prototipter emes, kerisinshe jappai qoldanýǵa daiyn tehnologiia ekenin ańǵartady", - dep qosty sarapshy.
Ǵalamdyq báseke jáne jańa indýstriia
Sarapshy bul úrdis tek sportpen shektelmeitinin atap ótti. Onyń pikirinshe, bul jaǵdai jahandyq tehnologiialyq tepe-teńdiktiń ózgerip jatqanyn da kórsetedi.
"Qytailyq kompaniialar demonstratsiialyq jobalardan góri júieli injenerlik ázirlemelerge basymdyq berip otyr. Sonyń nátijesinde olar tehnologiialardy tezirek damytyp, jańa baǵyttardy qalyptastyrýda alǵa shyǵyp keledi. Adam men robot endi qarsylas emes, ártúrli alańda óner kórsetetin eki bólek álem", - dep qorytyndylady ol.
