Býrabaida jergilikti bilik sot arqyly turǵyndar men kásipkerlerdiń jer telimderin qaitaryp ala bastaǵan. Zańgerlerdiń sózinshe, bul shamamen 1800 menshik iesine qatysty. Olardyń nebári 50-ge jýyǵy – kásipkerler, qalǵandary – Býrabai men Svetlyi aýyldarynyń qarapaiym turǵyndary, dep habarlaidy Dalanews.kz
Kásipker Igor Streltsov bir jyl buryn Býrabaidan 26 mln teńgege jer telimin satyp alyp, onda demalys aimaǵyn ashqan. Ol shamamen 400 mln teńge jumsap, aýmaqty tazalap, infraqurylym tartyp, 70 qonaqqa arnalǵan 24 úishik ornatqan. Barlyq úishik resmi túrde qujatymen paidalanýǵa berilgen. Degenmen jýyrda ol aldyńǵy jer ieleri jáne jergilikti bilik ókilderimen birge sotqa shaqyrylypty.
Bul talap aryzdy Aqmola oblysynyń Jer resýrstaryn basqarý departamenti túsirgen. Basqarma jer telimine qatysty barlyq mámileni jaramsyz dep tanýdy surap otyr.
"Árbir úishik zańdy túrde tirkelgen. Jer ýchaskesine notarialdy kýálandyrylǵan akt bar. Jer qomaqty qarjyǵa satyp alyndy. Barlyq nysan resmi túrde paidalanýǵa berilgen. Byltyr birneshe memlekettik organ tekserdi, eshqandai zańbuzýshylyq tappady. Mundai jaǵdai jalǵyz mende emes, basqa kásipkerlerde de osyndai másele bar. Olardyń aitýlarynsha, bul jer Memlekettik ulttyq tabiǵi parkke tiesili eken. Eger solai bolsa, ony qalaisha maǵan zańdy jolmen satty? Biz ishki týrizmdi damytyp, qaltamyzdan qarajat salyp jatyrmyz. Memleketten eshqandai kómek suraǵan joqpyz. Bul reiderlik basyp alý siiaqty", – deidi kásipker.
Bul isterge Aqmola oblysy prokýratýrasynyń narazylyǵy sebep bolǵan. Qadaǵalaýshy organ 2022 jyly Býrabai aýdany ákimdigi men máslihaty Býrabai aýylynyń shekarasyn zańsyz keńeitkenin anyqtaǵan. Al ulttyq park jeri halyqqa tiesili jáne jekeshelendirilmeidi.
